Дастгирии қишри ниёзманди ҷомеа дар меҳвари сиёсати инсонпарваронаи Ҳукумати Ҷумҳурии Тоҷикистон, хоса Пешвои миллат, Президенти кишвар муҳтарам Эмомалӣ Раҳмон қарор дорад. Ҳамин аст, ки ҳамасола дар арафаи ҷашну идҳо ба ин табақаи аҳолӣ кумак карда мешавад. 

Дар арафаи Ҷашни 30-солагии Истиқлоли давлатии Ҷумҳурии Тоҷикистон аз тарафи сокини деҳоти Ширинчашмаи ноҳияи Тоҷикобод Собирҷон Аҳмадов ба 30 оила аз 5 ҷамоати ноҳия кумаки яквақтаина, аз қабили орду равған дастрас шуд. Дар рафти тақсимоти маводи хӯрока ба ниёзмандон раиси ноҳия Қадриддин Фақерзода аз дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон бобати дастгирии табақаҳои ниёзманди аҳолӣ ёдовар гашта, аз аҳволи шахсони камбизоат пурсон шуд. 

Иқдоми соҳибкори мазкурро пайравӣ намуда, ба шахсони эҳтиёҷманди ноҳия расондани кумакҳои яквақтаина дар дигар деҳоти ноҳия низ идома дорад.

 

Дилшод АМИРОВ, «Ҷумҳурият»