12 сентябри соли 2021 дар "Наврӯзгоҳ"-и шаҳри Душанбе ба ифтихори 30-солагии Истиқлоли давлатии Тоҷикистон мусобиқаи байналмилалӣ оид ба гӯштии миллӣ баргузор шуд. Дар он паҳлавонони Беларус, Гурҷистон, Қазоқистон, Қирғизистон, Озарбойҷон, Россия, Тоҷикистон, Туркия, Украина, Узбекистон, Фаластин, Ҳиндустон ва Эрон ширкат намуданд. Дар мусобиқа паҳлавони тоҷик Хайрандеши Муродзод аз шаҳри Кӯлоб дар вазни 60 кг соҳиби медали тилло ва шоҳҷоиза – автомобил гардид.

Рақобатҳо дар вазнҳои 60 кг, 70 кг, 80 кг, 90 кг, +90 кг миёни мардон ва вазни 65 кг миёни бонувон ҷараён гирифта, ба ғолибони ҳар шаш вазн шоҳҷоиза – мошин, ба барандагони медалҳои нуқра 3000 доллар ва биринҷӣ 1500 доллар тақдим шуд.

Бояд зикр кард, ки  Хайрандеши Муродзод  9 июни соли 1998 дар шаҳри Кӯлоб ба дунё омада, аз соли 2008 инҷониб дар Муассисаи давлатии мактаби варзишии шаҳри Кӯлоб, таҳти роҳбарии мураббии гӯштии миллӣ Абдулло Саидхоҷаев тамрин менамояд. Хайрандеши Муродзод устоди варзиши Ҷумҳурии Тоҷикистон буда, ҳамчун варзишгари касбӣ борҳо дар мусобиқаҳои сатҳи ҷумҳуриявӣ ва байналмилалӣ бо дарки масъулияти баланди ватандӯстӣ иштирок ва Парчами Тоҷикистонро баланд бардоштааст.

 

Дилором ФАЙЗОВА, 

мудири бахши матбуоти Мақомоти иҷроияи 

ҳокимияти давлатии 

шаҳри Кӯлоб