Дар Ҷоми ҷаҳон оид ба санъати муҳорибаҳои омехта, ки аз 8 то 13 сентябр дар шаҳри Прагаи Чехия бо иштироки беш аз 400 варзишгар аз 21 давлати ҷаҳон доир гашт, се донишҷӯйи Донишкадаи тарбияи ҷисмонии Тоҷикистон ба номи С. Раҳимов - 

устоди варзиши дараҷаи   байналмилалӣ Ҷовидон Маҳмудов, устодони варзиш Ҳаким Абдуллоев ва Амирҳамза Исломов бо ба даст овардани як медали тилло, як нуқра ва як биринҷӣ дар ҳайати даставӣ баъди давлатҳои Украина ва Ирландия мақоми сеюмро касб карданд.

Воқеан, ҳар се аъзои дастаи яккачини ҷумҳурӣ оид ба санъати муҳорибаҳои омехта буда, то ин муддат дар бисёр мусобиқаҳои бонуфузи сатҳи баланд, аз ҷумла дар кишварҳои Дания, Олмон, Испания, Италия, Шведсия, Баҳрайн ва ҷумҳуриҳои ИДМ шарафи кишварро баланд  бардоштаанд.

Ба андешаи ректор Ш. Сафаров: “Дастоварди муҳассилини донишкада Ҷовидон Маҳмудов, Ҳаким Абдуллоев ва Амирҳамза Исломов дар рӯзҳои таҷлили 30-солагии Истиқлоли давлатӣ ва 50 - солагии Донишкада туҳфаи арзишманд буда, раёсати Донишкада минбаъд низ аз ин варзишгарони касбӣ дастовардҳои навро умед дорад”.

 

Мавлон ШАРИФОВ,  узви Иттифоқи журналистони Тоҷикистон