Дар шаҳри Хиваи Ӯзбекистон таҳти сарпарастии ЮНЕСКО Форуми байналмилалии фарҳангии «Осиёи Марказӣ дар чорроҳаи тамаддунҳои ҷаҳонӣ» баргузор гардид. Дар он намояндагони созмонҳои байналмилалӣ, назири ЮНЕСКО, СҲШ, ICOMOS, IССROM, ТРЮКСОЙ, коршиносони кишварҳои ИДМ, Иттиҳоди Аврупо, коршиносони соҳаи мероси фарҳангии маҳаллӣ, илм, санъат ва дигарон иштирок намуданд.

Зарфиятҳои сайёҳии Тоҷикистонро дар форум Камолиддин Муминзод, муовини раиси Кумитаи рушди сайёҳии назди Ҳукумати Ҷумҳурии Тоҷикистон, ки дар чорабинӣ ширкат дошт, муаррифӣ намуд. 

Сайёҳии экологӣ, табобатию солимгардонӣ, сайругаштӣ, таърихию фарҳангӣ, кӯҳнавардӣ ва шикор барои Тоҷикистон самтҳои афзалиятнок ба шумор мераванд. Барои рушди ин навъҳои сайёҳӣ мавҷудияти захираҳои бузурги онҳо имкон фароҳам меоранд. Қуллаҳои баланд, аз ҷумла қуллаи Исмоили Сомонӣ бо баландии 7495 метр ва манзараҳои кӯҳие, ки дар он ҷо метавон чор фасли солро мушоҳида кард, обҳои  шифобахшу шаффоф, иншооти санаторию курортӣ, мавзеъҳои таърихию фарҳангӣ ба рақобатпазирии маҳсулоти сайёҳии мамлакат дар минтақа мусоидат менамоянд. 

Ҳоло ҳамкорӣ миёни ширкатҳои сайёҳии Тоҷикистон ва кишварҳои Осиёи Марказӣ дар сатҳи зарурӣ ба роҳ монда шуда, хатсайрҳои минтақавӣ низ амалӣ шуда истодаанд. Ин омилҳо имкон медиҳанд, ки сайёҳони хориҷӣ зимни саёҳат ба Осиёи Марказӣ якбора аз се чор кишвари минтақа дидан намоянд. 

Хотиршинон менамоем, ки роҳнамои машҳури амрикоӣ ва австралиягии Lonely Planet Осиёи Марказиро минтақаи сол барои саёҳат дар соли 2020 муайян намуда, боздиди Тоҷикистон, Ӯзбекистон, Қазоқистон, Қирғизистон ва Туркманистонро тавсия дода буд. Вале бинобар пандемия сайёҳон аз кишварҳои дуру наздик ба ин минтақа сафар карда натавонистанд. Баъди ба маҷрои нав ворид шудани соҳа ва барқарор гаштани сафарҳои мунтазами сайёҳон ба кишварҳои ҷаҳон, Осиёи Марказӣ боз барои сайёҳон ба минтақаи диданӣ табдил хоҳад ёфт. 

Тарғиби дастовардҳои сайёҳӣ, маконҳои ҷолиби таърихию фарҳангӣ, манзараҳои зебову нотакрор ва табиати биҳиштосои Тоҷикистон дар чорабиниҳои минтақавию байналмилалӣ далели рушд ва густариши соҳаи сайёҳӣ дар даврони соҳибистиқлолии Тоҷикистон мебошад. 

 

Ш. ҚУРБОН, «Ҷумҳурият»