ШОҲҶОИЗА НАСИБИ ДДОТ ШУД

Донишҷӯйи ДДОТ ба номи Садриддин Айнӣ Дилшод Ниёзов дар озмуни ҷумҳуриявии «Нақши китоби «Тоҷикон»-и Бобоҷон Ғафуров дар шинохти асолати миллӣ» соҳиби Шоҳҷоиза гардид.

Озмуни мазкурро Академияи миллии илмҳо якҷо бо Кумитаи иҷроияи марказии ҲХДТ гузаронданд. Он дар байни хонандагони синфҳои болоии муассисаҳои таълимӣ ва донишҷӯён сурат гирифт. Муассисони озмун Дилшод Ниёзовро бо диплом ва 4000 сомонӣ қадр карданд.

 

 

АЗ «АНВОРИ МЕҲР» ТО БА «ФАЛАК»

Нашриёти “Адиб” маҷмуи шеърҳои шоир ва олими шинохта Кароматулло Олимзодаро бо номи “Анвори меҳр” ва пажӯҳиши номзади илми таърих Ҷонибек Асрориёнро зери унвони “Фалак” аз чоп баровард.

Файласуф Кароматулло Олимзода ва фарҳаншниос Ҷонибек Асрориён аз муаллифони фаъоли рӯзномаи «Ҷумҳурият» буда, намунаи шеъру мақолаҳояшон борҳо дар саҳифаҳои ин ҷарида рӯйи чопро дидаанд.

 

 

КИТОБХОНҲОИ БЕҲТАРИН МУАЙЯН ШУДАНД

Дар Китобхонаи давлатии бачагонаи ҷумҳуриявии ба номи Мирсаид Миршакар Озмуни ҷумҳуриявии Библиомарафон таҳти унвони “Ҳамнишине нест беҳтар аз китоб” ҷамъбаст гардид.

Тибқи хулосаи ҳайати ҳакамон 7 ғолиб ва 15 нафар иштирокчиёни фаъол муайян ва бо туҳфаҳои пулӣ сазовор гардиданд.

Шоҳҷоизаро Гулсуман Ғаниева, хонанда аз ноҳияи Восеъ соҳиб шуд. Ҷойи сеюм ба хонандагон Муҳаммадҷон Ҳалимов аз шаҳри Бохтар, Шаҳнозаи Сураҷ аз ноҳияи Ёвон ва Шукрона Салимова аз ноҳияи Мир Сайид Алии Ҳамадонӣ насиб гардид.

Алиҷони Мирзоалӣ аз ноҳияи Нуробод, Азиза Шарифова аз шаҳри Конибодом сазовори ҷойи дуюм ва Назаршоев Назаршо аз ноҳияи Роштқалъа соҳиби ҷойи якум гардиданд.

 

Бузургмеҳри БАҲОДУР, «Ҷумҳурият»