ТАСС. Марҳилаи фаъоли машқҳои зиддитеррористии кишварҳои Созмони ҳамкории Шанхай «Миссияи сулҳи  СҲШ - 2021» бо иштироки 5,5 ҳазор низомӣ рӯзи панҷшанбе дар машқгоҳи Донгузи вилояти Оренбург баргузор мешавад. Дар ин бора ба хабарнигорон аз хадамоти матбуоти Округи марказии низомӣ хабар доданд.

“Дар ҷараёни машқу тамринҳо, хизматчиёни ҳарбии Россия  дар якҷоягӣ бо ҳайати шахсии қисмҳои низомии Қувваҳои Мусаллаҳи Ҳиндустон, Қазоқистон, Қирғизистон, Чин, Покистон, Тоҷикистон, Ӯзбекистон ва Беларус бояд ҳамлаи душмани шартиро баргардонанд, ба ҳуҷум гузаранд ва қувваҳои асосии ӯро мағлуб намоянд",- гуфтанд дар хадамоти матбуот.

 

 

Ҳазораҳои Афғонистон ният доранд, ки дар сурати ваъдахилофии «Толибон» дубора ба майдони ҳарб баргарданд

ТАСС. Намояндагони ақаллияти шиа дар Афғонистон - ҷомеаи Ҳазораҳо ҳушдор доданд, ки агар  «Толибон» ваъдаҳои худро иҷро накунанд ва аз зулм худдорӣ нанамоянд, ба муқовимати мусаллаҳона бо онҳо бармегарданд.  Дар ин бора  собиқ ноиби Президенти Афғонистон Муҳаммад Карим Халилӣ, раҳбари ҷамоати Ҳазора, ки яке аз қавмҳои асосии этникии ин кишвар аст,  иттилоъ дод.

"То имрӯз мо ҳукумати муваққатии   «Толибон» - ро дидем, ки ба ҳеҷ ваҷҳ фарогир нест. Идомаи ин раванд барои дигар неруҳо ва гурӯҳҳои қавмӣ қобили қабул нест. Ҳеҷ шакке нест, ки чунин вазъ барои тоҷикон ва ӯзбекҳо тоқатнопазир хоҳад буд ва онҳо якҷо бо ҳазораҳо ба майдони ҷанг бармегарданд ", - гуфт Халилӣ.

 

 

Даъвати Шурои амнияти СММ аз Россия ва Чин

Лента.ру. Вазири корҳои хориҷии Британияи Кабир Лиз Трасс дар нишасти анъанавии вазирони корҳои хориҷии давлатҳои "панҷгона" узви доимии Шурои амнияти  СММ ният дорад, ки Россия ва Чинро ба ташаккули равиши ягонаи ҳамоҳангшуда оид ба Афғонистон ва робита бо «Толибон» даъват намояд.   

Дар ин бора хабаргузории Reuters бо такя ба изҳороти Вазорати корҳои хориҷӣ хабар дод. Дар ҳуҷҷат гуфта мешавад, ки барои ҷилавгирӣ аз табдил ёфтани Афғонистон ба "макони терроризми ҷаҳонӣ"   ҷомеаи ҷаҳонӣ, аз ҷумла Россия ва Чин, бояд дар масъалаи ҳамкорӣ бо «Толибон» якдилона амал кунанд.

 

 

Путин бо сарвазири Италия вазъи Афғонистонро баррасӣ кард

ТАСС. Хадамоти матбуоти Кремл хабар дод, ки Президенти Россия Владимир Путин дар як суҳбати телефонӣ бо сарвазири Италия Марио Драги вазъият дар Афғонистон ва барқарорсозии пас аз низоъро дар ин кишвар баррасӣ кард.

«Мубодилаи афкор оид ба вазъи Афғонистон идома ёфт. Ҳар ду ҷониб нияти ҳамкорӣ бо мақсади пешгирии хатари паҳншавии терроризм, экстремизм ва ҷиноятҳои марбут ба маводи мухаддирро иброз доштанд», - омадааст дар хабар. 

"Таваҷҷуҳи махсус ба мавзуи бозсозии баъдиҷангии Афғонистон, аз ҷумла дар робита ба фаъолияти “Гурӯҳи 20”, ки Италия имсол раёсати онро дорад,  зоҳир гардид",-илова кард Кремл.