Дар Ню-Йорк дар ҳошияи иҷлоси 76-уми Маҷмаи умумии СММ маросими имзои Баёнияи муштарак оид ба барқарор намудани муносибатҳои дипломатӣ байни Ҷумҳурии Тоҷикистон ва Ҷумҳурии Исломии Мавритания баргузор гардид.

Баёнияи муштаракро вазири корҳои хориҷии Тоҷикистон Сироҷиддин Муҳриддин ва вазири корҳои хориҷӣ, ҳамкорӣ ва мавританиягиҳои бурунмарзии Мавритания Исмоил Шайх Аҳмад имзо карданд.  

Вазирони ду кишвар, инчунин, аҳамияти рушди муносибатҳои дуҷониба ва бисёрҷонибаи Тоҷикистон ва Мавританияро таъкид доштанд.

 

 

Амрико ба Тоҷикистон 114 ҳазору 660 воя ваксина ворид намуд

Бо мақсади мубориза алайҳи бемории COVID-19 аз ҷониби Иёлоти Муттаҳидаи Амрико ба Ҷумҳурии Тоҷикистон 114 ҳазору 660 воя ваксинаи «Pfizer-BioNTech» дар чорчӯбаи фаъолияти механизми КОВАКС ва барномаи тақсимоти одилонаи вояҳои ваксинаҳои зидди COVID-19  ҳамчун ёрии башардӯстона ворид гардид.

Зимни маросими қабули ваксинаҳо муовини якуми вазири тандурустӣ ва ҳифзи иҷтимоии аҳолии  Ҷумҳурии Тоҷикистон Ғафур Муҳсинзода аз номи Ҳукумати Тоҷикистон ба Ҳукумати Амрико ҷиҳати дастгирӣ дар самти пешгирии бемории коронавирус, аз ҷумла ба таври ройгон дастрас намудани ваксинаҳо, изҳори миннатдорӣ намуд.

 

 

Густариши ҳамкорӣ дар соҳаи авиатсияи гражданӣ

Сафири Ҷумҳурии Тоҷикистон дар Шоҳигарии Арабистони Саудӣ Акрам Каримӣ бо раиси Агентии давлатии авиатсияи граждании Арабистони Саудӣ Абдулазиз ал-Дуайлиҷ мулоқот кард.

Ҷонибҳо доир ба рушди ҳамкориҳои байни ду кишвар дар соҳаи авиатсияи гражданӣ ва дигар масъалаҳои мавриди эҳтимоми тарафайн табодули назар намуданд.

 

 

Намояндагони доираҳои тиҷоратии Ӯзбекистон ба Тоҷикистон омаданд

Намояндагони доираҳои тиҷоратии Ҷумҳурии Ӯзбекистон ба Тоҷикистон омаданд. Сафари ҳайати тиҷоратии  «Made in Uzbekistan» ба Душанбе аз ҷониби Палатаи савдо ва саноати Тоҷикистон дар ҳамкорӣ бо Агентии пешбурди содироти назди Вазорати сармоягузорӣ ва савдои хориҷии Ӯзбекистон ташкил шуд. 

Ба иттилои Палатаи савдо ва саноати Тоҷикистон, ҳайати Ӯзбекистонро беш аз 40 ширкате, ки дар соҳаҳои бофандагӣ, чарм ва  пойафзол,  хӯрокворӣ, заргарӣ, дорусозӣ, сохтмон ва мебел фаъолият менамоянд, намояндагӣ мекунанд.

Дар доираи сафар форуми тиҷоратӣ бо иштироки намояндагони доираҳои тиҷоратии Тоҷикистон ва Ӯзбекистон баргузор мешавад. Ҳадаф - ҷалби сармоя, таъсиси корхонаҳои муштарак, дар ҳудуди Тоҷикистон ва минтақаҳои озоди иқтисодӣ мебошад. Инчунин, намоишгоҳи доимӣ таҳти бренди «Made in Uzbekistan»  ташкил мешавад, ки дар он  молистеҳсолкунандагони Ӯзбекистон маҳсулоти худро ба намоиш мегузоранд.

 

 

Нақшаи иммунизатсияи зидди COVID-19 қариб 40 дарсад иҷро шуд

Ба ҳолати 20 сентябр дар Тоҷикистон дар асоси нақшаи пешбинишуда 2 миллиону 307 ҳазору 140 нафар (39,6%) шаҳрванд ба эмкунии зидди бемории коронавируси COVID-19 фаро гирифта шуд. Инчунин, вояи дуюми ваксинаро то санаи зикргардида  1 миллиону 565 ҳазору  281 нафар гирифт, - хабар дод Вазорати тандурустӣ ва ҳифзи иҷтимоии аҳолӣ.

Бояд гуфт, ки тибқи қарори Ситоди ҷумҳуриявӣ оид ба пурзӯр намудани чораҳои зиддиэпидемиявӣ ва пешгирӣ аз интиқолу паҳншавии бемории сироятии COVID - 19 дар Ҷумҳурии Тоҷикистон, гирифтани ваксина барои шаҳрвандони синни аз 18 боло ҳатмӣ мебошад.