Лента.ру. Вазири корҳои хориҷии Россия Сергей Лавров гуфт, ки ҳамкории васеъ дар доираи Созмони Милали Муттаҳид, махсусан дар шароите талаб карда мешавад, ки давлатҳои абарқудрат оид ба принсипҳои тартиботи ҷаҳонӣ бо ҳам мувофиқ нестанд. Вай дар ин бора зимни муҳокимаи умумии сиёсӣ дар Ассамблеяи генералии СММ изҳор дошт. 

Вазир зикр кард, ки вохӯрӣ дар толори Ассамблеяи генералӣ рамзи барқарорсозии муколамаи муқаррарӣ мебошад, ки бо фарорасии пандемияи коронавирус қатъ гардида буд. Вай таъкид кард, ки ин созмон бояд дар сиёсати ҷаҳонӣ нақши ҳамоҳангсоз дошта, иқтидорашро барои «бисёрҷониба ва қонунияти универсалӣ» боз кунад.

 

 

Муфтии Афғонистон шиканҷаи руҳониёнро аз ҷониби ҷангиёни «Толибон» изҳор намуд

Лента.ру. Руҳониёни афғон пайвас-та аз ҷониби «Толибон» мавриди хушунат ва шиканҷа қарор мегиранд. Бинобар таъқибот, бисёр имомон маҷбур мегарданд, ки пинҳон шаванд. Дар ин бора, Муфтӣ Абдулқодир (ном бо сабабҳои амниятӣ иваз шудааст) дар мусоҳиба бо «Лента.ру»  гуфтааст.

Ба гуфтаи муфтӣ, ҷангҷӯён, ҳатто, раиси тамоми имомхатибони Афғонистонро боздошт намудаанд, ҳарчанд пас аз муддате ӯро бо пардохти гарав озод кардаанд. «Шикояти асосии «Толибон» аз руҳониён дар он аст: вақте онҳо бар зидди ҳукумати қаблӣ мубориза мебурданд,  мо онҳоро ёрӣ надодем ва ё дастгирӣ накардем. Ҳоло бисёр имомон дар ҳоли фироранд», - гуфт Абдулқодир.  

 

 

"Толибон" ҷасадҳоро дар майдони асосии шаҳри Ҳирот овехтанд

Лента.ру. «Толибон» ҷасадҳоро дар майдони асосии шаҳри Ҳирот овехтанд. Дар ин бора, Associated Press бо истинод ба як сокини маҳаллӣ хабар медиҳад. Ба гуфтаи шоҳиди айнӣ, «Толибон» чаҳор ҷасадро дар майдони асосӣ овехтанд ва се тани дигарро барои намоиш ба дигар қисматҳои шаҳр бурданд.

Зиёулҳак  Ҷалолӣ, сардори пулиси ноҳиявӣ дар шаҳри Ҳирот, гуфт, ки ҷасадҳо ба одамрабоён тааллуқ доранд, ки ҳангоми кӯшиши одамрабоӣ кушта шудаанд.

Солҳои 1996 - 2001, замоне, ки «Толибон» дар Афғонистон ҳокимият доштанд, ҷазоҳои оммавии васеъ паҳн мешуданд: дасту пойҳоро мебуриданд ва ба дор меовехтанд.

 

 

Чин аз номи кишварҳои ҳамфикр аз Шурои ҳуқуқи башари СММ даъват ба амал овард

Синхуа. Намояндаи доимии Чин дар СММ ва дигар созмонҳои байналмилалӣ дар Женева Чэн Сюй дар ҷаласаи 48-уми Шурои ҳуқуқи башари СММ бо изҳороти муштарак аз номи Чин ва беш аз 20 кишвари ҳамақида, ба мисли Россия, Куба, Шри - Ланка, Эрон, Тоҷикистон, Эфиопия ва Зимбабве даъват намуд, ки ба пешбурди адолати ҳуқуқи инсон мусоидат намояд. 

Чэн Сюй ишора кард, ки кори ШҲБ дар ҳоли ҳозир бо мушкилоти ҷиддӣ рӯ ба рӯ аст: принсипҳои универсалӣ, беғаразӣ, холисӣ ва интихоб накардан поймол мешаванд. Баъзе кишварҳо аз нигарониҳои ҳуқуқи башар дар кишварашон чашм мепӯшанд ва зери ниқоби ҳуқуқи башар бо ҳадафҳои сиёсӣ ба корҳои дохилии кишварҳои дигар мудохила мекунанд ва мекӯшанд, ки арзишҳои худро ба онҳо бор намоянд. Чунин амалҳо ба соҳибихтиёрӣ ва истиқлоли дигар кишварҳо зарари ҷиддӣ мерасонанд, ба ҳамбастагӣ ва ҳамкории байналмилалӣ, инчунин, талошҳои байналмилалӣ оид ба пешбурд ва ҳифзи ҳуқуқи инсон халал мерасонанд. Ҷомеаи ҷаҳонӣ бояд барои муқовимат ба чунин амалҳо якҷоя кор кунад.