иҷтимоиёт
МЕЪМОР
Меъморӣ пешаест заҳматталаб, ки на ҳар кас дар ин ҷода метавонад муваффақ шавад. Дар баробари меҳнатқарин будан, шахс бояд дорои маҳорати воло ва тахайюлоти рангин бошад, ки ниятҳои хешро дар амал татбиқ намояд. Қаҳрамони мо – меъмори барҷаста Баҳоваддин Зуҳурдинов маҳз аз зумраи чунин нафарон аст, ки фаъолияти панҷоҳу панҷсолаи пурсамари ӯ далели ин гуфтаҳоянд.
Мавсуф зодаи пойтахт буда, пас аз хатми мактаб ба Омӯзишгоҳи рассомии шаҳри Душанбе дохил шуда, онро соли 1966 бо баҳои аъло ба итмом мерасонад. Ҳамчунон, хатмкардаи Институти политехникии Тоҷикистон (ҳоло Донишгоҳи техникии Тоҷикистон ба номи академик М.С. Осимӣ) ва Институти меъмории Москва мебошад.
Маҳорати волои устод ҳанӯз аз рӯзҳои аввали фаъолияташ ҳувайдо гардида буд ва он сол ба сол сайқал меёфт. Натиҷаи ҳамин заҳматҳо буд, ки имрӯз Баҳоваддин Зуҳурдиновро на танҳо дар кишвар, балки берун аз он яке аз барҷастатарин меъморон мешиносанд. Офаридаҳои устод аз ҳам ба куллӣ фарқ дошта, маънои ба худ хос доранд ва моро ба олами рангину афсонавӣ мебаранд. Ин маъноро мо метавонем дар лоиҳаҳои иншооти “Чойхонаи Саодат”, “Маҷмааи модар - ватан”, “Маҷмааи меъморӣ бо муҷассамаи шоҳ Исмоили Сомонӣ”, Маҷмааи 2700 - солагии Кӯлоби бостонӣ”, “Қасри миллат”, биноҳои “Пойтахт – 80”, “Амфитеатр” ва ғайраву ғайра мушоҳида намоем. Боиси тазаккур аст, ки чанд сол қабл бинои “Қасри миллат” миёни зеботарин кохҳои олам мақоми дувумро гирифт, ки ҳунарманди чирадаст будани устодро собит месозад. Қобили зикр аст, ки эҷодиёти Баҳоваддин Зуҳурдинов шаҳрҳои Федератсияи Россия, Ҳиндустон, Австралия ва дигар мамлакатҳоро зинат мебахшанд, ки ин фахри мо – тоҷикон аст.
Тамоми муваффақиятҳои хешро Баҳоваддин Зуҳурдинов аз баракати сиёсати хирадмандонаи Пешвои муаззами миллат Эмомалӣ Раҳмон медонад ва чуноне таъкид месозад, мо бояд аз сулҳу амоние, ки ба шарофати талошҳои хастагинопазири Сарвари маҳбубамон дар Ватани азизамон пойдор шуд, шукр гузорем ва баҳри рушду нумӯ ва боз ҳам баланд бардоштани нуфузи мамлакатамон дар арсаи байналмилалӣ пайваста саъй намоем.
Тули фаъолияти панҷоҳу панҷсолаи бобарору пурбаракати хеш устод дар ривоҷу равнақи санъати меъмории кишвар саҳми арзанда гузоштааст ва ҳамин аст, ки хизматҳои содиқонаи ӯ аз ҷониби роҳбарияти олии мамлакат бо Ифтихорномаи Ҳукумати Ҷумҳурии Тоҷикистон, ордени “Дӯстӣ”, Ҷоизаи давлатии Ҷумҳурии Тоҷикистон ба номи Абуабдуллоҳи Рӯдакӣ ва ғайра қадр гардида, бо як қатор мукофотҳои байналмилалӣ мушарраф мешавад.
Оятулло РАҲМАТУЛЛОЗОДА, меъмор
Меҳрбону АШУРОВА, меъмор
Баёни ақида (0) Санаи нашр: 30.09.2021 №: 195 Мутолиа карданд: 506