1 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо мақсади шиносоӣ аз вазъи зиндагии мардум, ифтитоҳи як қатор иншооти таъиноти гуногун ва суҳбату мулоқот бо сокинон ба ноҳияи Мир Сайид Алии Ҳамадонӣ ташриф оварданд.

Пешвои миллат муҳтарам Эмомалӣ Раҳмонро дар даромадгоҳи ноҳия сокинон бо самимияти хосса истиқбол гирифтанд.

Дар ин ҷо Президенти мамлакат нахуст, аз болои лавҳаи рамзии маҷмаи даромадгоҳи ноҳия парда бардошта, онро ифтитоҳ карданд.

Маҷмаи нави даромадгоҳи ноҳияи Мир Сайид Алии Ҳамадонӣ дар шафати шоҳроҳи ноҳияҳои Мир Сайид Алии Ҳамадонӣ ва Фархор дар масоҳати 500 метри мураббаъ бо қитъаи сабзкорӣ ва чароғонкунӣ бунёд гардидааст.

Баландии маҷмаа 10 метрро ташкил дода, он бо навиштаҷоти ноҳияи Мир Сайид Алии Ҳамадонӣ, 12 сутунпоя ва акси аллома Мир Сайид Алии Ҳамадонӣ ороиш ёфтааст.

Маҷмаи даромадгоҳи ноҳия бо тарҳи нави меъморӣ ва зерпояи он бо сангҳои мармар сохта шудааст.

 

Роҳи нав мебарад ба сӯйи комёбиҳои нав

Баъди ифтитоҳи Маҷмаи даромадгоҳи ноҳия Президенти Ҷумҳурии Тоҷикистон муҳтарам Эмомалӣ Раҳмон 16,1 километр роҳи дорои аҳамияти ҷумҳуриявиро, ки солҳои дароз таъмирталаб буд, баъди азнавсозӣ мавриди истифода қарор доданд.

Тавре иттилоъ дода шуд, ин шоҳроҳ дар доираи нақшаи чорабиниҳо бахшида ба истиқболи Ҷашни бузурги 30-солагии Истиқлолияти давлатии Ҷумҳурии Тоҷикистон бо маблағҳои буҷетӣ ва саҳми соҳибкорони маҳаллӣ бо харҷи беш аз 15 миллион сомонӣ пурра навсозӣ гардид.

Таҷдиди роҳи мазкур аз охири соли 2020-ум оғоз шуда, бо истифода аз техникаи муосир ва ҷалби мутахассисони соҳа дар муҳлати муқарраргардида бо сифати баланд ба анҷом расонда шуд.

Роҳ дар масофаи 13,1 километр то даромадгоҳи шаҳраки Москва бо паҳноии 7,5 метр асфалтпӯш гардидааст.

Зимни муаррифии лоиҳаи таҷдиду азнавсозии роҳ иттилоъ дода шуд, ки дар доираи навсозии роҳ дар ҳудуди деҳоти Меҳнатобод ва Қаҳрамон 4 пул низ таъмиру таҷдид гаштааст.

Дар доираи вусъати тадбирҳои созандагию бунёдкорӣ ба истиқболи Ҷашни 30-солагии Истиқлоли давлатии Ҷумҳурии Тоҷикистон ва нақшаи чорабинии Солҳои рушди деҳот, сайёҳӣ ва ҳунарҳои мардумӣ, дар ин давра дар ҳудуди деҳоти Меҳнатобод, Қаҳрамон, Панҷоб ва Чубеки ноҳия бо дастгирии соҳибкорон ва шахсони ватандӯст роҳҳои маҳаллӣ низ, асфалтпӯш шудаанд.

Дар  маҷмуъ,  дар  ноҳияи  Мир  Сайид Алии  Ҳамадонӣ ба истиқболи Ҷашни миллӣ – 30-солагии Истиқлоли давлатии Ҷумҳурии Тоҷикистон бо дастгирии Мақомоти иҷроияи маҳаллии ҳокимияти давлатӣ ва соҳибкорони маҳаллӣ дар масофаи беш аз 30 километр роҳҳои дорои аҳамияти ҷумҳуриявӣ ва маҳаллӣ пурра асфалтпӯш гардидаанд.

Президенти Ҷумҳурии Тоҷикистон муҳтарам Эмомалӣ Раҳмон аснои шиносоӣ бо лоиҳаи таҷдиду навсозии роҳ ташаббуси соҳибкоронро дар самти азнавсозии роҳу пулҳои дорои аҳамияти ҷумҳуриявӣ ва маҳаллии ҳудуди ноҳия намунаи олии ватандӯстӣ ва саҳмгузорӣ дар ободию пешрафти кишвар арзёбӣ карданд.

 

Ифтитоҳи Муассисаи таҳсилоти  миёнаи умумии рақами 42

1 октябр дар идомаи сафари корӣ дар ноҳияи Мир Сайид Алии Ҳамадонӣ Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бинои Муассисаи таҳсилоти миёнаи умумии рақами 42-юми ноҳияро мавриди истифода қарор доданд.

Муассисаи нави таълимии деҳаи Навободи деҳоти Меҳнатободи ноҳия бо дастгирии Ҳукумати Ҷумҳурии Тоҷикистон ва бо маблағгузории Бонки исломии рушд бахшида ба Ҷашни 30-солагии Истиқлоли давлатии Ҷумҳурии Тоҷикистон бо харҷи 3 миллиону 500 ҳазор сомонӣ бунёд гардид.

Иншооти мазкур аз 2 ошёна, 13 синфхона, 2 ҳуҷраи корӣ ва китобхона иборат буда, дар он 528 хонанда дар ду баст ба таҳсил фаро гирифта мешавад.

Президенти Ҷумҳурии Тоҷикистон муҳтарам Эмомалӣ Раҳмон дар бинои нави Муассисаи таҳсилоти миёнаи умумии рақами 42 - юм аз шароити синфхонаҳои таҳсилоти ибтидоӣ, омӯзиши технологияи компютерӣ, китобхона ва кабинетҳои фаннӣ дидан намуданд.

Синфхонаи омӯзиши технологияи компютерии муассисаи таълимӣ бо 24 адад компютери муосиру тахтаи электронӣ, кабинетҳои фаннии химия, биология, физика ва китобхона пурра бо лавозимоти зарурӣ ва аёниятҳои хониш ҷиҳозонда шудаанд.

Сарвари давлат муҳтарам Эмомалӣ Раҳмон ба сифати корҳои сохтмонӣ дар бинои нави муассисаи таълимӣ ва таъмини он бо шароити замонавии донишандӯзӣ баҳои баланд дода, хонандагонро ба омӯзиши ҳар чи хубтари барномаи таълимӣ, аз ҷумла фанҳои дақиқ, ширкат дар озмунҳои фаннӣ, мутолиаи китобу асарҳои бадеӣ, иштирок дар озмунҳои ҷумҳуриявии “Фурӯғи субҳи доноӣ китоб аст...” ва “Илм - фурӯғи маърифат” ҳидоят намуданд.

Дар Муассисаи таҳсилоти миёнаи умумии рақами 42 айни замон 485 хонанда ба таҳсил фаро гирифта шудааст. Барои беҳтар намудани шароити таълиму тарбия дар асоси татбиқи сиёсати маорифпарваронаи Президенти мамлакат дар баробари бунёди иншооти нави таълимӣ бинои пештараи он иборат аз 11 синфхона пурра аз таъмири асосӣ баромад.

Бинои нави муассисаи таълимӣ бо шабакаи мустақили гармидиҳӣ пайваст буда, дар шафати он майдончаи хурди варзиш барои ташкили машғулиятҳои тарбияи ҷисмонӣ ва омодагии дифои ҳарбӣ бунёд гардидааст.

Иттилоъ доданд, ки дар ноҳияи Мир Сайид Алии Ҳамадонӣ барои рушди соҳаи маориф ва беҳбудии сатҳи таълим, таъмини ҷойҳои нишасти хонандагон давоми солҳои соҳибистиқлолӣ бо дастгирии Ҳукумати Ҷумҳурии Тоҷикистон беш аз 20 муассисаи нави таълимӣ сохта мавриди истифода қарор дода шуд.

Президенти Ҷумҳурии Тоҷикистон муҳтарам Эмомалӣ Раҳмон омӯзгорон ва аҳли маорифи ноҳияро вазифадор намуданд, ки ба кори таълиму тарбия таваҷҷуҳи бештар зоҳир карда, хонандагонро дар руҳияи ватандӯстӣ ва ифтихори миллӣ ба камол расонанд.

 

Роҳандозии корхонаи истеҳсоли  халтаҳои полипропиленӣ

1 октябр Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар деҳоти Қаҳрамони ноҳияи Мир Сайид Алии Ҳамадонӣ Корхонаи истеҳсоли халтаҳои полипропилении Ҷамъияти дорои масъулияти маҳдуди “Мирзо Раҷаб”-ро ифтитоҳ намуданд.

Корхонаи нави саноатӣ дар доираи тадбирҳои созандагӣ ба ифтихори 30-солагии Истиқлоли давлатии Ҷумҳурии Тоҷикистон ва татбиқи ҳадафи чоруми миллӣ - саноатикунонии босуръати кишвар аз тарафи соҳибкори ватанӣ Ҷиёнхон Мирзоев бо харҷи 1,7 миллион сомонӣ бунёд гашт ва 26 сокини маҳаллӣ бо ҷойи кори доимӣ ва маоши хуб таъмин шуд.

Дар корхона чор хати муосири технологӣ, ки аз Федератсияи Россия ва Ҷумҳурии Мардумии Чин ворид гардидааст, васлу насб шуда, 10 намуд  халтаи полипропиленӣ бо андозаҳои гуногун истеҳсол мешавад. Тамоми номгӯйи маҳсулоти истеҳсолшаванда аз лиҳози намуд ва сифат ба меъёрҳои байналмилалӣ ҷавобгӯ мебошад.

Сарвари давлат муҳтарам Эмомалӣ Раҳмон зимни шиносоӣ бо фаъолияти корхонаи навбунёди истеҳсолӣ ба соҳибкори маҳаллӣ барои  ҷонибдорӣ аз сиёсати пешгирифтаи Ҳукумати мамлакат ҷиҳати бо шуғли доимӣ ҷалб кардани сокинон ва, ба ин восита, баланд бардоштани сатҳи некуаҳволии мардум, изҳори сипос намуданд.

Иттилоъ доданд, ки иқтидори истеҳсолии корхона дар як шабонарӯз аз 1500 то 2000 дона халтаи полипропиленӣ мебошад, ки солона зиёда аз 600 ҳазор ададро ташкил медиҳад.

Дар корхона ашёи хом - полипропилен аз Федератсияи Россия ва ҷумҳуриҳои Ӯзбекистону Қазоқистон дар асоси шартномаи ҳамкорӣ дастрас гардида, то марҳилаи ниҳоӣ коркард мешавад.

Айни замон халтаҳои полипропилении истеҳсоли корхона дар бозор, марказҳои савдову хизматрасонӣ, мағозаҳо ва дигар нуқтаҳои фурӯши молҳои саноатӣ ва масолеҳи сохтмонӣ ба таври васеъ истифода мегарданд. Халтаҳои полипропилении калонҳаҷм, асосан, барои маҳсулоти хӯрокворӣ ва кишоварзӣ пешбинӣ шудаанд.

Коргарон нақша доранд, ки дар баробари таъмини талаботи бозорҳои дохилӣ, истеҳсолотро бештар карда, содироти маҳсулоти ватаниро ба кишварҳои ҳамсоя низ ба роҳ монанд. Ҳадаф аз бунёди корхонаи истеҳсоли халтаҳои полипропиленӣ дар ноҳияи Мир Сайид Алии Ҳамадонӣ тақвияти иқтидори истеҳсолии шаҳру ноҳияҳои минтақаи Кӯлоб мебошад.

Пас аз шиносоӣ бо ҷараёни истеҳсолот дар корхонаи нав Пешвои миллат муҳтарам Эмомалӣ Раҳмон аз намоиши маҳсулоти саноатӣ, хӯрокворӣ ва сохтмонӣ, ки аз ҷониби саноатчиёни ноҳия ташкил шудааст, дидан карданд.

Дар намоиш намаки ошии ёддор, равғани рустанӣ, меваю сабзавоти консервшуда ва масолеҳи гуногуни сохтмонӣ муаррифӣ шуд.

Таъкид гардид, ки айни замон дар ноҳияи Мир Сайид Алии Ҳамадонӣ 68 корхонаи саноатӣ амал мекунад, ки ба истеҳсоли маҳсулоти гуногун, аз қабили орду равған, намак, коркарди меваю сабзавот ва дигар навъи маҳсулоти зарурии рӯзгор, машғул мебошанд.

Ҳиссаи соҳаи саноат ба иқтисодиёти ноҳия назаррас буда, ҳамасола бо таъсис ва фаъолияти босамари коргоҳу корхонаҳои нав ҳаҷми маҳсулоти истеҳсолӣ меафзояд.