Ин нукта зимни конференсияи ҷумҳуриявӣ бахшида ба бузургдошти Мавлоно Ҷалолиддини Балхӣ зери унвони «Мо барои васл кардан омадем», ки дар Муассисаи таҳсилоти миёнаи умумии №9-уми Ҷамоати деҳоти Сангтӯдаи ноҳияи Данғара бо иштироки намояндагони Вазорати маориф ва илми ҷумҳурӣ, олимон, шоирону нависандагон, муҳаққиқон, омӯзгорону донишҷӯён ва хонандагону сокинон доир шуд, баён гардид.

Умедҷон  Сафарзода,  директори Маркази ҷумҳуриявии муассисаҳои таҳсилоти иловагии назди Вазорати маориф ва илм иброз дошт, ки Ҷалолиддини Балхӣ миёни сухансароён, шоирону орифони адабиёту фарҳанги оламшумули тоҷику форс ҷойгоҳи хос дошта, бо эътибори андешаҳои ирфонӣ, ахлоқӣ, фалсафӣ ва афкори гаронқадри маънавии хеш беш аз 800 сол маъруф аст. Ҷаҳони тафаккури ин алломаи ирфону адаб ҳамеша андешаҳои инсонгароиву инсонсозиро ба ҳукми шиори зиндагӣ ва ҳикмати пурбори маънавӣ ҷилвагар месозад. 

Гуфта шуд, ки яке аз бузургтарин муҳаққиқи амрикоӣ Колман Брокс, дар ин ақида аст, ки зодгоҳи Ҷалолиддин Вахш аст. Пажӯҳишгари олмонӣ Аннамери Шиммел низ бар он бовар аст, ки зодгоҳи Мавлоно Вахш мебошад. Ба қавли олими швейтсариягӣ Фритс Мейер дар шимолии Балх бо номи Вахш падари Ҷалолиддин ҳамчун фақеҳ ва воизи дорои ақидаи тасаввуфӣ кору зиндагӣ мекард. Ҳолноманависи Мавлоно Аҳмади Афлокӣ дар «Маноқиб - ул - орифин» ривоят кардааст, ки падари Мавлоно қозии Вахш, марде буд муътабар ва аз уламои аълами замони худ. О.Ф. Акимушкин мегӯяд: «Ҷалоллидин Муҳаммад дар таърихи 30 сентябри соли 1207 дар яке аз музофотҳои Балх, дар чорроҳаи шаҳри корвонгузари Левакант дар роҳи Чин ба Ҳинд ва Эрону Мовароуннаҳр қарор дошт, таваллуд шуд». Худи Мавлоно дар асари «Маснавии маънавӣ» - и безавол ҷойе аз Вахш ёд карда мегӯяд:

Ақли ҷузвӣ ҳамчу барқасту дурахш,

Дар дурахше кай тавон шуд сӯйи Вахш.

Муаррихони рус академикҳо В.В. Бертолд ва В.С.Соловёв Левакантро Сангтӯда хондаанд. Ин гуфтаҳои донишмандон аз он шаҳодат медиҳанд, ки аз Вахшонзамин будани Мавлоно Ҷалолиддин бофтаву сохта набуда, аз ҷониби олимони Шарқу Ғарб тасдиқ ва мавриди таъкид қарор гирифтааст. Агар мо ба гузаштагони худ эҳтиром дорем, бояд Мавлоноро ифтихори миллат ва Ватан бишморем, ҳар панди ӯро шиори зиндагӣ кунем. 

Дар конференсия маърӯзачиёну хонандагон оид ба осори адабии Мавлоно ва нақши ӯ дар худшиносии миллӣ, шуҳрати ҷаҳонӣ ва дигар паҳлуҳои осори ин орифи покзамир сухан ва аз «Девони кабир» ва «Маснавии маънавӣ» ғазалу достонҳо аз ёд гуфтанд. Тасмим гирифта шуд, ки ҳар солгарди ин мутафаккири бузургро дар Сангтӯда баргузор созанд.