Вобаста ба эълон гардидани «Душанбе – пойтахти фарҳангии Иттиҳод - 2021» дар Китобхонаи миллӣ бо иштироки намояндагони Ӯзбекистон, Қазоқистон, Озарбойҷон, Арманистон, Беларус, Молдова, Федератсияи Россия ва  созмонҳои марбут ба фаъолияти китобдории узви ИДМ конференсияи байналмилалии «Се даҳсолаи шарикии  китобхонаҳои Иттиҳоди Давлатҳои Мустақил: дурнамо ва стратегияи рушд» доир шуд. 

 

Конференсияро  директори китобхона Ҷумъахон Файзализода оғоз бахшида, иброз дошт:

- Ҳамкорӣ бо китобхонаҳои кишварҳои Иттиҳоди Давлатҳои Мустақил аз самтҳои муҳими фаъолияти байналмилалии Китобхонаи миллии Тоҷикистон маҳсуб меёбад. То имрӯз ба хотири рушди ҳамкорӣ дар самти китобдорӣ як қатор ёддоштҳои тафоҳум ба имзо расидаанд, ки дар доираи онҳо корҳои муҳим  ба анҷом расиданд.

Мушовири калони бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Нурулло Оқилзода аз сиёсати фарҳангии Ҳукумати Ҷумҳурии Тоҷикистон сухан гуфта, таъкид намуд, ки бо дастгириву ғамхориҳои ҳамешагии  Пешвои миллат муҳтарам Эмомалӣ Раҳмон дар бисёр шаҳру ноҳияҳои кишвар китобхонаҳои муосир бунёд ёфтанд, ки ба боз ҳам боло рафтани сатҳи дониши наврасону ҷавонон мусоидат намуданд.

Зимни ҳамоиш ширкаткунандагон, ҳамчунин, оид ба озмуни ҷумҳуриявии «Фурӯғи субҳу доноӣ китоб аст» ва «Илм – фурӯғи маърифат» ибрози андеша намуданд. Зикр гардид, ки ин озмунҳо бо мақсади боз ҳам баланд бардоштани завқи китобхонӣ, тақвияти неруи зеҳнӣ, арҷ гузоштан ба арзишҳои миллию фарҳангӣ, инкишофи қобилияти эҷодӣ, таҳкими эҳсоси худогоҳию худшиносӣ, такмили захираи луғавӣ миёни аҳолии кишвар ва ихтироъкориву навоварӣ роҳандозӣ гардиданд. 

Дар доираи ҳамоиш миёни Китобхонаи миллии Тоҷикистон ва Китобхонаи миллии Ӯзбекистон ба номи Алишери Навоӣ, Китобхонаи давлатии умумирусиягии адабиёти хориҷии ба номи М.И. Рудомино ёддоштҳои тафоҳум ба имзо расиданд.

 

Гулнисои САЪДОНШО, «Ҷумҳурият»