Ба шарофати соҳибихтиёрӣ ва заҳматҳои хастагинопазири Пешвои муаззами миллат, Президенти Ҷумҳурии Тоҷикистон муҳтарам Эмомалӣ Раҳмон Ватани маҳбубамон сол ба сол дар тамоми соҳаҳо, аз ҷумла иқтисодёт,  муваффақ мегардад. 

 

Боиси тазаккур аст, ки ҳанӯз дар аввалин сухаронии худ аз минбари баланди Созмони Милали Муттаҳид Сарвари давлат муҳтарам Эмомалӣ Раҳмон таъкид намуданд: “Роҳи пешгирифтаи Тоҷикистон ин тавлиди сохти иқтисодии бозории мутамаддин мебошад, ки рӯ ба иҷтимоиёт нигаронида шудааст”. 

Баъдан, дар кишвар марҳилаи ташаккул ва рушди иқтисоди бозорӣ оғоз ёфта, яке аз иқдомҳои муҳим дар ин самт қабули  Барномаи таҳаввулоти иқтисодии Ҷумҳурии Тоҷикистон барои солҳои 1995 – 2000-ум буд, ки бисёр вазифаҳои принсипиалии он бомуваффақият  иҷро шуданд.

Дар баробари ин, бо мақсади фароҳам овардани замина барои рушди устувори  иқтисодӣ бо ташаббуси Пешвои муаззами миллат муҳтарам Эмомалӣ Раҳмон Стратегияи миллии рушд барои давраи то соли 2015 ва якчанд стратегияву барномаҳои миёнамуҳлат, ки асоси комёб шудан ба Ҳадафҳои Рушди Ҳазорсола мебошанд, таҳия ва қабул гардиданд. Тоҷикистон дар ин ҳуҷҷатҳои стратегӣ афзалиятҳои иқтисодӣ, иҷтимоӣ, фарҳангӣ ва ҳуқуқии хешро муайян намуда, барои ноил гардидан ба ин ҳадафҳо тамоми тадбирҳои муассирро роҳандозӣ намудааст.

Қобили зикр аст, ки ҳатто соли 2009, ҳангоми буҳрони азими иқтисодиву молиявии ҷаҳонӣ, ба Тоҷикистон муяссар гардид, то таъсири ин буҳронро ба иқтисодиёт кам карда, тамоюли мусбати рушди онро нигоҳ дорад. 

Ҳамзамон, чуноне тули солҳои Истиқлолияти давлатӣ мушоҳида мегардад, дар кишвар мунтазам ислоҳоти иқтисодӣ ва дигаргунсозиҳои институтсионалию сохторӣ гузаронда мешаванд, ки ин барои такмили низоми молиявӣ ҷавобгӯ ба талаботи меъёрҳои муосири ҷаҳонӣ бисёр муҳим ва ҳадафнок мебошанд. 

Гузашта аз ин, солҳои истиқлолият як силсила мушкилоту монеаҳои ҷомеаи навин бартараф гардида, таҳкурсии давлати соҳибихтиёр гузошта шуд, корҳои азими бунёдкориву созандагӣ ва ислоҳоти амиқи иқтисодӣ оғоз ёфта, аз ҷумла таъмини истиқлолияти энергетикӣ, аз бунбасти коммуникатсионӣ баромадан, таъмини амнияти озуқаворӣ ва саноатисозии босуръати мамлакат ҳадафҳои стратегӣ эълон гашта, дар ин ҷода низ як қатор комёбиҳо ба даст омадаанд.

Ҳамчунин, тайи солҳои ахир рушди маҷмуи маҳсулоти дихилӣ  ҳар сол ба ҳисоби миёна 7-дарсадӣ таъмин мегашт ва ба ҳар сари аҳолӣ меафзуд. Аз ҷумла, соли 2020, сарфи назар аз таъсири манфии бемории сироятии коронавирус, ба Тоҷикистон муяссар шуд, ки рушди ММД-ро дар сатҳи 4, 5 дарсад таъмин созад ва ҳаҷми он ба 82,5 миллиард сомонӣ расад.

Тамоми ин пешравиҳо ва комёбиҳо ба шарофати саъю кӯшиш ва талошҳои ҳамешагии Пешвои миллат муҳтарам Эмомалӣ Раҳмон ба даст омадаанд, зеро мақсаду мароми Сарвари маҳбуби тоҷикон ободии Ватани азиз, болоравии сатҳи зиндагии мардум ва, дар маҷмуъ, боз ҳам баланд шудани обрӯву нуфузи Тоҷикистон дар арсаи байналмилалӣ мебошад. 

Аз ин лиҳоз, месазад, ки сокинони кишвар, бахусус насли ояндасози миллат, зиракии сиёсиро аз даст надода, пайрави асили Пешвои муаззами миллат муҳтарам Эмомалӣ Раҳмон бошанд ва дар ин ҷодаи пурифтихор саҳми арзандаи хешро гузоранд.

 

Нусратулло АБДУЛЛОЕВ, корманди КВД “Истеҳсол, харид, захира ва фурӯши маҳсулоти ниёзи аввалияи шаҳри Душанбе”