ДАР БАЛҶУВОН ОСОРХОНАИ НАВ СОХТАНД

Дар ноҳияи Балҷувон бо иштироки Пешвои миллат муҳтарам Эмомалӣ Раҳмон Осорхонаи таърихию кишваршиносӣ ба истифода дода шуд. Дар ин бора аз Институти таърих, бостоншиносӣ ва мардумшиносии АМИТ ба мо иттилоъ доданд. 

Тибқи иттилоъ осорхона аз 5 шуъба  иборат буда, дар он бозёфтҳое, ки бостоншиносон зимни корҳои ҳафриётӣ аз ҳудуди ноҳия пайдо намудаанд, ҳифзу нигоҳдорӣ  мешаванд. Экспонатҳое, ки ҳоло дар он ба маъраз гузошта шудаанд, мансуб ба асрҳои IX – XIX ҳастанд. 

Бинои осорхона аз се ошёна иборат буда, ҳар ошёна давраҳои таърихии ба худ хосро инъикос менамояд ва дар он барои ҳифзи нигораҳо, бозёфтҳо ва аксу мусаввараҳо шароити зарурӣ фароҳам мебошад.

 

 

ДАСТХАТҲОИ ЭЙНШТЕЙНРО БА МУЗОЯДА МЕГУЗОРАНД

Ҳисобҳои дастнависи олими машҳури физика Алберт Эйнштейн дар шаҳри Париж ба музояда гузошта мешаванд. Дар ин бора шабакаи телевизионии “Известия” хабар дод. 

Тибқи иттилои манбаъ, ёддоштҳои олим дар коллексияи хонаи музоядаи “Christie's”, ки дар Ҳонконг ҷойгир аст, нигоҳдорӣ мешаванд. Дар дастхатҳо ҳисобҳои олим оид ба назарияи нисбият оварда шудаанд. Эйнштейн, инчунин, ба ҳисобҳо шарҳҳо низ илова кардааст, ки метавон аз рӯйи  он хулосаҳои ӯро пайгирӣ намуд. Мубориза барои лот 23 ноябр оғоз мешавад, нархи ибтидоии он 2 миллион евро муайян шудааст. 

 

 

ТАҒЙИРЁБИИ ИҚЛИМ.  МОРО ЧӢ ИНТИЗОР АСТ?

Олимони Донишгоҳи Аризонаи  ИМА зимни гузарондани тадқиқот муайян намуданд, ки то соли 2060 атмосфераи Атлантикаи Шимолӣ метавонад аз доираи тағйирёбии табиӣ берун барояд. Ба гуфтаи олимон, эҳтимол ин ҳолат метавонад боиси якбора афзудани фалокатҳои табиӣ - хушксолӣ, сӯхтор, тӯфону обхезӣ гардад. Натиҷаҳои ин тадқиқот дар маҷаллаи “Proceedings of Academy of National Sciences” нашр шудаанд.

Дар мақола зикр мешавад, ки пажӯҳишгарон бар асоси омӯзиши яхбандии Гренландия – калонтарин ҷазираи Замин дар Амрикои Шимолӣ, таърихи  ин тағйиротро муайян ва оқибатҳои онро баррасӣ ва пешгӯйӣ карданд. 

Зимнан, моҳи август аз гузориши Панели байниҳукуматӣ оид ба тағйирёбии иқлими Созмони Милали Муттаҳид маълум шуд, ки  дар натиҷаи гармшавии глобалӣ Замин ба фалокати гӯшношунид рӯ ба рӯ хоҳад шуд. Ба гуфтаи коршиносони ин созмон, агар то соли 2030 партовҳои дуоксиди карбон ду баробар ва то соли 2050 комилан коҳиш наёбанд, мумкин аст ҳарорат дар рӯйи Замин то ба дараҷаи гӯшношунид боло равад. 

 

Фарзона ФАЙЗАЛӢ, 

“Ҷумҳурият”