Чунин як иншооти ҷашнӣ, аз ҷумла майдончаи варзиши хуштарҳу замонавии хурди футбол, ки аз тарафи соҳибкори маҳаллӣ Ҳофизи Бобоназар дар Ҷамоати деҳоти Зиракӣ, деҳаи Маҳмадалӣ Ғаффор сохта мавриди баҳрабардорӣ қарор гирифт, боиси хурсандии наврасону ҷавонони деҳа гашт. Майдончаи варзиш бо тамоми шароитҳои муосир сохта шуда, дар гирду атрофи он нишастгоҳҳои замонавӣ ва чароғҳои равшандиҳанда насб гардидаанд. Майдонча дар масоҳати 10 садяк замин бо маблағи 335 ҳазор сомонӣ сохта шуд. 

Соҳибкори маҳаллӣ Ҳофизи Бобоназар ҳангоми суҳбат гуфт: "Боиси хушнудӣ ва сарфарозист, ки имрӯз соҳаи варзиш зери таваҷҷуҳи Пешвои миллат, Президенти мамлакат муҳтарам Эмомалӣ Раҳмон қарор дошта, дар тамоми манотиқи ҷумҳурӣ садҳо толору майдонҳои варзиш сохта шуда, мавриди баҳрабардорӣ қарор гирифтанд, ки ин дар оммавӣ шудани варзиш ва солимгардонии аҳолӣ мусоидат менамоянд". 

- Мо - соҳибкорони маҳаллӣ дастуру супоришҳои Пешвои миллат муҳтарам Эмомалӣ Раҳмонро сармашқи кор қарор дода, тасмим гирифтем, ки ҳамроҳи бародарон дар деҳаи худ як майдончаи варзиши хурди футбол созем, то он миёни ҷавонону наврасон рушд кунад. Дар деҳаи Маҳамадалӣ Ғаффор то имрӯз чунин майдончаи хуштарҳу замонавӣ вуҷуд надошт. Ҷавонон дар як майдони пур аз чангу хок футбол мекарданд, ки умуман ба талабот ҷавобгӯ набуд. Имрӯз бошад бо кушода шудани чунин як майдончаи варзиш хурсандии онҳо  ҳадду канор надорад, - гуфт ӯ.   

Иқдоми пешгирифтаи соҳибкори маҳаллӣ лоиқи таҳсин буда, дар оммавӣ гардондани варзиш ва тарғиби тарзи ҳаёти солим миёни ҷавонону наврасон саҳми беандоза дорад. Соҳибкор, ҳамчунин, нақша дорад, ки дар солҳои оянда дар назди майдончаи варзиш боз як толори варзишии болопӯшида барои машқу тамрини ҷавонон бо тамоми шароитҳои замонавӣ бунёд намояд.