Муовини якуми раиси Бонки миллии Тоҷикистон Ҷамолиддин Нуралиев бо ҳайати намояндагии Бонки ҷаҳонӣ, аз ҷумла  менеҷери макроиқтисодӣ, савдо ва сармоягузорӣ Сандип Махаҷан ва коршиноси калони иқтисодии бонки мазкур Ивайло Изворский, мулоқот анҷом дод.

 

Ҷамолиддин Нуралиев аз ҳамкории самарабахшу судманди Бонки миллии Тоҷикистон ва Бонки ҷаҳонӣ дар самти татбиқи лоиҳаҳои гуногун, ки ба рушди иқтисодии Ҷумҳурии Тоҷикистон нигаронда шудааст, изҳори қаноатмандӣ карда, оид ба нишондиҳандаҳои низоми бонкии кишвар, амалигардонии як қатор ислоҳот ҷиҳати татбиқи босамари сиёсати пулию қарзӣ ва гузариши батадриҷ ба реҷаи ҳадафгирии таваррумӣ маълумот пешниҳод намуд.

Ҷамолиддин Нуралиев таъкид дошт, ки тадбирҳои андешидаи Ҳукумати Ҷумҳурии Тоҷикистон ва Бонки миллии Тоҷикистон дар самти коҳиш додани таъсири манфии пандемияи COVID-19 ба иқтисодиёти кишвар, аз ҷумла низоми бонкӣ ва бо ин мақсад, пешниҳоди як қатор имтиёзҳо ба ташкилотҳои қарзии молиявии ҷумҳурӣ имкон фароҳам оварданд, ки соли молиявии сипаригардида мусбат ҷамъбаст шавад.

Ҳамчунин, бо нишон додани вазъи нишондиҳандаҳои макроиқтисодӣ дар кишварҳои минтақа, Бонки миллии Тоҷикистон тавассути пешбурди сиёсати мутавозии пулию қарзӣ ва истифодаи босамари фишангҳои монетарӣ тавонист дар чунин шароити печида сатҳи таваррумро муътадил нигоҳ дорад. Пешбурди сиёсати самараноки қурбӣ ва тасҳеҳи саривақтии қимати қурби расмии доллари ИМА имкон фароҳам овард, ки қурби пули миллӣ нисбат ба асъори хориҷӣ муътадил нигоҳ дошта шавад.

Менеҷери макроиқтисодӣ, савдо ва сармоягузории Бонки ҷаҳонӣ Сандип Махаҷан оид ба саҳми низоми бонкӣ дар рушди иқтисодии кишвар ва тадбирҳои андешидашуда ҷиҳати бартараф намудани пайомадҳои пандемияи COVID-19 андеша ронда, дар ин самт ислоҳоти роҳандозинамудаи Бонки миллии Тоҷикистонро самараовар ва муассир баён кард. Ӯ гуфт, ки ислоҳоти низоми бонкӣ дар Тоҷикистон устуворона ва ҳадафмандона татбиқ гардида, натиҷаҳои мусбат ба бор меоранд, ки инро институтҳои молиявии байналмилалӣ эътироф менамоянд.

Дар ҷараёни мулоқот муовини раиси Бонки миллии Тоҷикистон Моҳбону Накҳатзода доир ба лоиҳаи “Стратегияи миллии фарогирии  молиявии Ҷумҳурии Тоҷикистон барои солҳои 2021-2025”, ки дар раванди баррасии ниҳодҳои дахлдор қарор дорад, маълумоти муфассалро манзури ҳозирон гардонда, дар ин самт тақвияти ҳамкориҳои судмандро бо Бонки ҷаҳонӣ ҷиҳати татбиқи минбаъдаи он муҳим арзёбӣ намуд.

 

Муҳаммадзоиршо ШАРИФЗОДА, 

"Ҷумҳурият"