Ба шуғл фаро гирифтани сокинони кишвар, бахусус занону духтарони хонашин, аз масъалаҳои мавриди таваҷҷуҳи Асосгузори сулҳу ваҳдати миллӣ – Пешвои миллат Президенти Ҷумҳурии Тоҷикистон муҳтарам Эмомалӣ Раҳмон маҳсуб меёбад. Дар ин самт якчанд барномаҳои давлатӣ низ дар мамлакат қабул ва амалӣ гардида истодаанд. 

Вобаста ба ин масъалаи муҳиму афзалиятнок имрӯзҳо дар ноҳияи Данғара корҳои зиёд ба сомон расонда мешаванд. Тавре сардори шуъбаи Агентии меҳнат ва шуғли аҳолии ноҳия Салимҷон Нуралиев ба «Ҷумҳурият» иттилоъ дод, ҳадафи асосии онҳо мусоидат ба корҳои доимӣ ва мавсимӣ, паст кардани сатҳи бекорӣ, танзими бозори меҳнат ва зиндагии шоистаи мардум мебошад.

Ҷиҳати дар амал татбиқ намудани Барномаи давлатии мусоидат ба шуғли аҳолӣ барои солҳои 2020 - 2022 давоми нуҳ моҳи соли ҷорӣ ба шуъбаи Агентии меҳнат ва шуғли аҳолии ноҳия 1169 корҷӯ муроҷиат карда, аз ин ҳисоб 1052 нафар мутобиқи талаботи Қонуни Ҷумҳурии Тоҷикистон «Дар бораи мусоидат ба шуғли аҳолӣ» ба қайд гирифта шуда, 763 нафар дар ташкилоту муассисаҳо ва корхонаҳо ба кор таъмин шуд. 

Мувофиқ ба талаботи бозори меҳнат, дар ҷамоати шаҳрак ва ҷамоатҳои Оқсу, Корез, Лолазор, Исмат Шарифов, Сангтӯда дар моҳи августи соли равон 245 корҷӯ аз рӯйи 11 ихтисос: қаннодӣ, дузандагӣ, компютер, гулдузӣ, попуридӯзӣ, кафшергари барқ, чакандӯзӣ, қуроқдӯзӣ, ороиши мӯй, адрасбофӣ ва забонҳои хориҷӣ ба омӯзиш фаро гирифта шуданд. Ҳамзамон, аз ҳисоби ҷавонписарону ҷавондухтарон ва модарони серфарзанд 45 нафар имсол бо ҷойи кор дар асоси роҳхат дар беморхонаи марказии ноҳия, ёрии аввалияи тиббӣ - санитарӣ ва ҶСП «Ҷунтай- Данғара Син Силу текстил» ба кор таъмин шуд. 

Дар асоси нақша дар ноҳия 11 ярмаркаи ҷойҳои холии корӣ ва вазифаҳои озод бо иштироки намояндагони Мақомоти иҷроияи маҳаллии ҳокимияти давлатии ноҳия, ташкилоту муассисаҳо, корхонаҳо ва ҷамоатҳо бо корфармоён гузаронда шуда, ба ин восита 133 нафар ба кор таъмин шуд, ки 53 нафар зан мебошад.  

 

Холназар КАСИРОВ, «Ҷумҳурият»