Дар бораи ворид намудани илова ба Қарори Ҳукумати Ҷумҳурии Тоҷикистон аз 2 декабри соли 2005, № 472

 

Мутобиқи моддаи 56 Қонуни Ҷумҳурии Тоҷикистон «Дар бораи санадҳои меъёрии ҳуқуқӣ» Ҳукумати Ҷумҳурии Тоҷикистон қарор мекунад:

Ба эзоҳи замимаи Қарори Ҳукумати Ҷумҳурии Тоҷикистон аз 2 декабри соли 2005, № 472, «Дар бораи тасдиқи андозаи хироҷҳои гумрукӣ барои хизматрасонии гумрукӣ» ҷумлаи дуюм бо мазмуни зерин илова карда шавад:

«Андозаи хироҷҳои гумрукие, ки дар банди 1 дарҷ шудааст, нисбати молу воситаҳои нақлиёти таҳти низоми гумрукии транзити гумрукии байналмилалӣ ҷойгирбуда, татбиқ намегардад.».

 

Раиси Ҳукумати 

Ҷумҳурии Тоҷикистон Эмомалӣ РАҲМОН

 

 

 

 

ҚАРОРИ Ҳукумати Ҷумҳурии Тоҷикистон

аз 9 октябри соли 2021, № 432, ш. Душанбе

 

Дар бораи  Тартиби истифодаи мошинҳои назоратӣ-хазинавӣ дар реҷаи вақти воқеӣ (онлайн) ва низомҳои хазинаҳои шартан (виртуалӣ) ҳангоми анҷоми ҳисоббаробаркуниҳои пулӣ бо аҳолӣ

 

Мутобиқи моддаи 15 Қонуни конститутсионии Ҷумҳурии Тоҷикистон «Дар бораи Ҳукумати Ҷумҳурии Тоҷикистон», моддаи 38 Кодекси андози Ҷумҳурии Тоҷикистон ва моддаи 57 Қонуни Ҷумҳурии Тоҷикистон «Дар бораи санадҳои меъёрии ҳуқуқӣ» Ҳукумати Ҷумҳурии Тоҷикистон қарор мекунад:

1. Тартиби истифодаи мошинҳои назоратӣ–хазинавӣ дар реҷаи вақти воқеӣ (онлайн) ва низомҳои хазинаҳои шартан (виртуалӣ) ҳангоми анҷоми ҳисоббаробаркуниҳои пулӣ бо аҳолӣ тасдиқ карда шавад (замима мегардад).

2. Субъектҳои хоҷагидор, ки бо аҳолӣ муомилоти нақдӣ ва ғайринақдӣ анҷом медиҳанд, ҳангоми истифодаи маблағҳои пулии нақдӣ ва ғайринақдӣ мошинҳои назоратӣ-хазинавии дорои имконияти реҷаи вақти воқеӣ (онлайн)-ро истифода намоянд.

3. Вазорати молияи Ҷумҳурии Тоҷикистон якҷо бо Кумитаи давлатии сармоягузорӣ ва идораи амволи давлатии Ҷумҳурии Тоҷикистон ва Кумитаи андози назди Ҳукумати Ҷумҳурии Тоҷикистон оид ба хариди мошинҳои назоратӣ-хазинавӣ дар реҷаи вақти воқеӣ (онлайн) ва низомҳои хазинаҳои шартан (виртуалӣ) ҳангоми анҷоми ҳисоббаробаркуниҳои пулӣ бо аҳолӣ аз ҳисоби ҷалби маблағҳои грантии шарикони рушд, кумаки техникӣ, барои субъектҳои соҳибкории калон бошад, аз ҳисоби дигар манбаъҳои молиявие, ки қонунгузорӣ манъ накардааст, чораҳои зарурӣ андешад.

4. Кумитаи андози назди Ҳукумати Ҷумҳурии Тоҷикистон:

- ҷиҳати марҳила ба марҳила то 31 июли соли 2022 таъмин намудани субъектҳои хоҷагидор бо мошинҳои назоратӣ-хазинавӣ дар реҷаи вақти воқеӣ (онлайн) ва низомҳои хазинаҳои шартан (виртуалӣ) ҳангоми анҷоми ҳисоббаробаркуниҳои пулӣ бо аҳолӣ чораҷӯӣ намояд;

- назорати аз ҷониби субъектҳои хоҷагидор риоя гардидани талаботи тартибро таъмин намояд;

- якҷо бо вазорату идораҳои дахлдор санадҳои меъёрии ҳуқуқии худро дар муҳлати ду моҳ бо қарори мазкур мутобиқ намояд.

5. Қарори Ҳукумати Ҷумҳурии Тоҷикистон аз 2 майи соли 2013, № 210, «Дар бораи Тартиби истифодаи мошини назоратӣ-хазинавии дорои хотираи фискалӣ (аз ҷумла, ҳангоми муомилот бо кортҳои пардохтӣ ва штрихкодҳо), талаботи техникӣ ба мошинҳои назоратӣ-хазинавии дорои хотираи фискалӣ (назоратӣ), инчунин, талабот нисбат ба системаи компютерӣ оид ба назорати хизматрасониҳои алоқаи мобилӣ ва хизматрасониҳои электронӣ» аз эътибор соқит дониста шавад.

 

Раиси Ҳукумати 

Ҷумҳурии Тоҷикистон Эмомалӣ РАҲМОН