Бинои беморхонаи марказии ноҳияи Восеъ аз даврони Шуравӣ боқӣ монда, таъмирро тақозо мекард. Беморхонаи мазкур бо ташаббуси Ҳукумати мамлакат дар ҳамкори бо Бонки рушди Олмон тармим гардида, дар рафти сафари кории Президенти кишвар ба истифода дода шуд. Бинои муассиса бо тарҳи муосир навсозӣ шудааст. 

 

Тибқи иттилои масъулон, барои таъмиру таҷдиди бинои беморхона ва муҷаҳҳаз гардондани шуъбаҳо бо таҷҳизотҳои ташхисию табобатӣ аз ҷониби Ҳукумати кишвар ва шарикони рушд, аз ҷумла Бонки рушди Олмон 53 миллион сомонӣ харҷ шудааст. Бинои беморхона сеошёна буда, масоҳати умумии он се гектарро дар бар мегирад.  

Сарахон Иброҳимзода, сартабиби беморхона, дар суҳбат ба хабарнигори «Ҷумҳурият» гуфт, ки чанд сол қабл шароит дар беморхона хуб набуд, таҷҳизоти ташхисию табобатӣ намерасид, катҳои хоб фарсуда буданд. Бо дастгирии Ҳукумати мамлакат дар остонаи Ҷашни 30 – солагии Истиқлоли давлатӣ бинои беморхона навсозӣ шуда, бо лавозимоти тиббӣ муҳайё гардид. Инчунин, барои зебогии муассиса дар атрофи он гулҳои мавсимию ҳамешасабз шинонда шуда, ҳудуди бино сафолакпӯш гардид.

Гуфта шуд, ки беморхона аз даҳ шуъбаи бистарикунонӣ, шаш ёрирасон ва ду ташхисию табобатӣ иборат буда, бо таҷҳизоти наву замонавӣ, аз ҷумла дастгоҳи сабти барқии дил, дастгоҳи нафасдиҳии сунъӣ, рентгени рақамӣ, ултрасадо ва дигар таҷҳизоти ташхисӣ таъмин аст. Феълан беморхона дорои 197 кати хоб буда, дар он 48 табиб ва 156 корманди миёнаи тиб кору фаъолият мекунад. 

 

Суннати СОДИҚ, «Ҷумҳурият»