Дар Осорхонаи миллӣ бахшида ба Ҷашни 30 - солагии Истиқлоли давлатии Ҷумҳурии Тоҷикистон таҳти унвони “Дастовардҳои бостоншиносии Осорхонаи миллии Тоҷикистон дар даврони Истиқлол” намоиш ва конференсияи илмӣ баргузор гардид.

 

Дар конференсия аз ҷониби бостоншиносон ва осорхонашиносон оид ба фаъолияти бостоншиносии Осорхонаи миллӣ маърузаҳои илмӣ ироа гардида, паҳлуҳои гуногуни он мавриди муҳокима ва баррасӣ қарор гирифтанд. Аз ҷумла зикр гардид, ки нақши Осорхонаи миллии Тоҷикистон дар кашф, омӯзиш, нигоҳдорӣ ва муаррифии ёдгориҳои пурарзиши таърихӣ хеле муҳим ва назаррас буда, фаъолияти бостоншиносии он то ба имрӯз мустақиман ва ба таври густурда идома дорад. Дар ин муддат кормандони осорхона дар ёдгориҳои Сайёди ноҳияи Абдураҳмони  Ҷомӣ, Чимқӯрғони ноҳияи Шаҳринав, Ғаравқалъаи Ёвон ва Ҳалқаҷари ноҳияи Хуросон корҳои бостоншиносӣ баргузор намуда, ба дастовардҳои назаррас ноил гардидаанд. Маҳз натиҷаи корҳои бостоншиносӣ мебошад, ки насли имрӯз бо осори ниёгон дастрасӣ пайдо намуда, бо паҳлуҳои гуногуни ҳаёт ва рӯзгори онҳо шинос мегардад.

Дар намоиш дук, зарфҳои сафолӣ, шамъдон, муҳра, ашёҳои фулузӣ (пайкон, мех, зангӯла), хурмача, бутакчаҳои гилин, борсангҳо, дастпона, ангуштарин ва сиккаҳо, дар маҷмуъ, беш аз 500 адад бозёфтҳои бостоншиносони муассиса ба намоиш гузошта шудааст.

Осори дар ин намоиш ба маърази дид гузошташуда баёнгари инкишофи муносиботи пулӣ, тиҷоратӣ, ҳунармандӣ, дину мазҳаб, фарҳанг ва дигар паҳлуҳои зиндагии мардуми ин сарзамин мебошанд. Ҳамзамон баён гардид, ки дар солҳои минбаъда донишҷӯёни ихтисоси бостоншиносии донишгоҳу донишкадаҳои кишвар ба корҳои археологӣ ҷалб карда мешаванд.

Дар Осорхонаи миллии Тоҷикистон фаъолияти бостоншиносӣ баъд аз расидан ба Истиқлоли давлатӣ ва ба истифода додани бинои нави он шуруъ гардидааст. Зеро бо ташаббуси Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон шароити зарурӣ муҳайё гардида, бахши алоҳидае бо номи шуъбаи бостоншиносӣ ва сиккашиносӣ ба фаъолият шуруъ намуд. Ҳоло дар ин шуъба мутахассисони кордону соҳибкасб аз қабили 4 доктор ва 6 номзади илм барои муайян ва мусоидат намудан ба корҳои бостоншиносон фаъолият намуда истодаанд.

 

Лола РИЗОӢ, “Ҷумҳурият”