- Муносибатҳои Тоҷикистону Корея, ки ба манофеи ду кишвар нигаронда шудаанд, таърихи тулонӣ доранд. Тибқи маълумот, аллакай, дар асри VI миёни давлатҳои мо табодули афкор сурат гирифтааст. Маҳз чунин робитаҳои таърихии мамлакатҳо асоси инкишофи муносибатҳои имрӯза мебошанд. Агар дар бораи муносибатҳои имрӯзаи Тоҷикистону Корея сухан гӯем, пас соли оянда дар арафаи таҷлили 30-солагии барқарории муносибатҳои дипломатӣ равобити кишварҳо дар соҳаи сиёсӣ, иқтисодӣ ва гуманитарӣ ба сатҳи сифатан нав мебароянд.

Ин матлабро Ё Сонг Бэ, муовини вазири корҳои хориҷии Ҷумҳурии Корея, ки ба манзури баррасии масъалаҳои калидии тадорукотию мундариҷавии XIV Форуми ҳамкории Корея – Осиёи Марказӣ ба Тоҷикистон омада буд, дар як суҳбати вижа бо хабарнигори «Ҷумҳурият» баён дошт. Қарор аст, ин форум поёни моҳи ноябр дар шаҳри Душанбе баргузор гардад.

Суҳбати мо бо Ё Сонг Бэ баъд аз мулоқоташ бо Фарҳод Салим, муовини вазири корҳои хориҷии Ҷумҳурии Тоҷикистон доир шуд. Ин дипломати баландпоя дар идомаи суҳбат ёдовар шуд, ки соли 2015 сафари Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Корея сурат гирифт. Соли 2019 Сарвазири Корея Ли Нак Ён ба Тоҷикистон ташриф оварда буд. Имсол Раиси Парламенти Ҷумҳурии Корея Пак Бён Сок бо сафари расмӣ аз Тоҷикистон боздид кард, ки ин сафарҳо барои рушди муносибатҳо такони нав бахшиданд. 

Тибқи иттилои муовини вазир, дар назар аст, ки қабл аз баргузории форум вазири корҳои хориҷии Корея ба Тоҷикистон ташриф оварда, бо вазири корҳои хориҷии Тоҷикистон мулоқот намояд. Ё Сонг Бэ ба ин бовар аст, ки гуфтугӯйи вазирони корҳои хориҷӣ самту уфуқҳои нави равобити ду кишвари бо ҳам дӯстро муайяну мушаххас хоҳанд кард. 

- Мо аз соли 2007 инҷониб Форуми ҳамкории Корея – Осиёи  Марказиро таъсис додем ва он қариб 15 сол мешавад, ки фаъолият дорад. Бори нахуст расман имсол дар шаҳри Душанбе ин нишаст дар сатҳи вазирони корҳои хориҷӣ мегузарад. Мавзуъҳои меҳварии нишасти Душанбе доир ба ҳифзи саломатӣ, экология ва рақамисозӣ мебошад. Дар доираи ин ҳамоиш мо лоиҳаҳои воқеии ҳамкориҳои Корея ва Осиёи Марказӣ, махсусан Тоҷикистонро муайян мекунем, ки ба рушди иқтисодӣ ва иҷтимоии кишварҳо мусоидат мекунанд, - изҳор дошт Ё Сонг Бэ, муовини вазири корҳои хориҷии Корея дар суҳбат бо мо.

 

Маҳмуд МИРЗОЁН,  «Ҷумҳурият»