ҲУҶҶАТИ ҚАЛБАКӢ

Директори «Чархи Роғун»-ро  ба курсии айбдорӣ шинонд

Агентии назорати давлатии молиявӣ ва мубориза бо коррупсия хабар дод, ки парвандаи ҷиноятӣ нисбат ба Нематулло Ибодуллозода баъд аз анҷоми тафтиши пешакӣ бо фикри айбдоркунӣ барои моҳиятан баррасӣ намудан ба суд ирсол шуд. 

Нематулло Ибодуллозода ба он айдор мешавад, ки ҳамчун дирекори мактаби ронандагии ҶДММ «Чархи Роғун»-и шаҳри Истаравшан аз шаҳрванд «А» барои тайёр карда додани шаҳодатномаи ронандагии дараҷаҳои «В,С,Е» 8200 сомонӣ талаб намуда, аз ин маблағ 5000 сомониро пешакӣ гирифтааст. Номбурда ин амалро дар ҳамдастӣ бо Илҳомҷон Абдуллоев анҷом дода, ҳангоми гирифтани боқимондаи маблағ – 3200 сомонӣ  дар ҷойи ҳодиса дастгир шудааст.

Оид ба ин ҳолат нисбат ба ҳар ду ришваситон бо моддаи 247 қисми 2 бандҳои «б,в,г» (қаллобӣ, бо истифода аз мақоми хизматӣ) парвандаи ҷиноятӣ оғоз шудааст, ки ин банди қонун ҷирима ба андозаи аз сесаду шасту панҷ то нуҳсаду дувоздаҳ нишондиҳанда барои ҳисобҳо ё маҳрум сохтан аз озодӣ ба муҳлати аз ду то панҷ солро пешбинӣ менамояд.

 

ДУЗДӢ

Милитсия ба дасти гумонбар завлона зад

Кормандони мақомоти корҳои дохилӣ дар шаҳри Конибодом марди 38- солаеро боздошт намуданд, ки ба содир кардани ҷиноятӣ дуздӣ гумонбар дониста мешавад.

Тибқи иттилои сомонаи Вазорати корҳои дохилӣ, марди дастгиршуда охирҳои моҳи октябри соли 2021 як адад зарфи оҳании обгирии ғунҷоишаш 15 ҳазор литраро, ки мансуб ба сокини 59-солаи Ҷамоати деҳоти Пулотони шаҳри Конибодом аст, дуздидааст.

Зарари расондашуда 13 ҳазору 500 сомонӣ ҳисоб шуда, оид ба ин ҳодиса бо моддаи 244 қисми 2 Кодекси ҷиноятӣ (дуздӣ) парвандаи ҷиноятӣ оғоз шудааст.

 

ҒОРАТГАРӢ

Боздошти ду нафар  барои тасарруфи телефон

Мақомоти милитсия дар шаҳри Душанбе амалкарди ду нафареро тафтиш мекунанд, ки ба гумони содир намудани ҷинояти ғоратгарӣ дастгир шудаанд.

Сомонаи Вазорати корҳои дохилӣ аз боздоштшудаҳо мардони 26 ва 30-сола ном бурдааст, ки ҳанӯз моҳи августи соли 2021 аз дукони дӯзандагии зани 37-сола, воқеъ дар бозори Паҷшери шаҳри Душанбе як адад телефони мобилии гаронарзишро тасарруф намуда, аз ҷойи ҳодиса ғайб задаанд.