Хабарҳо
Вохӯрии Сироҷиддин Муҳриддин бо кормандони Сафорати Тоҷикистон дар Россия
Вазири корҳои хориҷӣ Сироҷиддин Муҳриддин дар масири сафари худ ба Париж, ҷиҳати иштирок дар иҷлосияи 41-уми Конфронси генералии ЮНЕСКО, (9 – 24 ноябри соли ҷорӣ) бо кормандони Сафорати Тоҷикистон дар Россия мулоқот кард.
Вазири корҳои хориҷӣ дипломатҳоро ба муносибати Рӯзи Конститутсияи Ҷумҳурии Тоҷикистон табрик намуда, аҳамияти қабули онро ба сифати санади тақдирсози сиёсӣ ва ҳуқуқӣ таъкид сохт.
Ӯ, ҳамчунин, ба сафири фавқулода ва мухтори Ҷумҳурии Тоҷикистон дар Федератсияи Россия Давлатшоҳ Гулмаҳмадзода медали “30-солагии Истиқлолият”-ро, ки бо Фармони Президенти Ҷумҳурии Тоҷикистон сарфароз гаштааст, тақдим кард.
Академияи илмҳои кишоварзӣ 30-сола шуд
Бахшида ба 30-солагии Академияи илмҳои кишоварзӣ бо иштироки вазири кишоварзӣ Сулаймон Зиёзода, сардори раёсати кишоварзӣ ва ҳифзи муҳити зисти Дастгоҳи иҷроияи Президенти Ҷумҳурии Тоҷикистон Мирзодавлат Сабурзода, раиси Кумитаи бехатарии озуқаворӣ Маҳмадсаид Файзуллозода, президенти Академияи илмҳои кишоварзӣ Нуралӣ Асозода конфронси илмӣ баргузор гардид.
Бино ба маълумоти шуъбаи матбуоти Вазорати кишоварзӣ, дар конфронс баромадҳои олимон бо презентатсияҳо намоиш дода шуд. Дар фарҷом олимону мутахассисони соҳа барои дастовардҳо дар соҳаи кишоварзӣ аз рӯи 31 номина сазовори мукофотҳо гаштанд.
Густариши ҳамкорӣ бо UNODC
Муовини вазири корҳои хориҷӣ Музаффар Ҳусейнзода намояндаи минтақавии Раёсати СММ оид ба маводи мухаддир ва ҷинояткорӣ (UNODC) дар Осиёи Марказӣ Ашита Митталро ба ҳузур пазируфт.
Дар суҳбат ҷонибҳо масъалаҳои мубрами ҳамкории тарафайнро дар чаҳорчӯбаи барномаву лоиҳаҳои созмони мазкур дар самти пешгирӣ ва мубориза бо гардиши ғайриқонунии маводи мухаддиру дигар ҷинояткориҳо мавриди муҳокима қарор доданд.
Мулоқот бо сафири Эрон
Шараф Шерализода, муовини вазири корҳои хориҷӣ, бо сафири фавқулода ва мухтори Ҷумҳурии Исломии Эрон дар Ҷумҳурии Тоҷикистон Муҳаммадтақӣ Собирӣ мулоқот кард.
Мусоҳибон масъалаҳои рушди ҳамкориҳои дуҷониба дар соҳаҳои тиҷорату иқтисод, аз ҷумла ташвиқи сармоягузорӣ, бонкдорӣ ва дигар мавзуъҳои қобили таваҷҷуҳи тарафайнро баррасӣ намуданд.
Зимни вохӯрӣ онҳо ҳавасмандии худро ҷиҳати густариши ҳамкориҳо иброз доштанд.
Ярмаркаи идона
Ба муносибати иди касбии кормандони милитсия – 10 ноябр, бо ибтикори роҳбарияти Вазорати корҳои дохилӣ дар назди бинои марказии вазорат ярмаркаи идонаи хӯрокворӣ доир гардид.
Дар он деҳқонони хоҷагиҳои ёрирасон ва раёсату воҳидҳои поёнии ВКД, аз ҷумла РВКД дар вилояти Хатлон, РВКД дар минтақа ва ноҳияи Рашт, шаҳру навоҳии Истаравшан, Ҳисор, Ваҳдат, Рӯдакӣ, Носири Хусрав, Данғара ва амсоли инҳо маҳсулоти тару тозаи полизиву меваҷот ва дигар анвои хӯрока, аз ҷумла равған, биринҷ, гӯшт, нахӯд, картошка, пиёз, карам, сабзӣ, тухмро бо нархҳои аз 30 то 40 фоиз арзон нисбат ба бозор пешкаши харидорон намуданд.
Баёни ақида (0) Санаи нашр: №: Мутолиа карданд: 1018