Хабарҳо
ЛИГАИ ОЛӢ
БАРОИ ҚАҲРАМОНИИ «ИСТИҚЛОЛ» ЯК ҚАДАМИ ДИГАР МОНД
Бозиҳои даври 23-юми Чемпионати Тоҷикистон оид ба футбол миёни дастаҳои Лигаи олӣ ба анҷом расид. Дар қувваозмоии марказии давр «Хуҷанд» дар майдонаш «Хатлон»-ро бо ҳисоби 2:1 шикаст дод.
Садрнишини ҷадвали чемпионат – «Истиқлол» дар меҳмонӣ ба дарвозаи «Эсхата» се голи беҷавоб зад.
Натиҷаи се вохӯрии дигар: «Душанбе» – «Файзканд» – 0:1, «Истаравшан» – «Равшан» – 1:0, КМВА – «Кӯктош» – 2:0.
Ҳамин тавр, «Истиқлол» пас аз ин пирӯзӣ бо касби 58 хол мавқеашро дар зинаи аввал мустаҳкам намуда, то қаҳрамонии навбатиаш дар Лигаи олӣ як қадами дигар мондааст.
Тими «Хуҷанд» бо 48 хол ва КМВА бо 39 хол дар зинаҳои дуюму сеюм қарор доранд.
САМБО
ШИРКАТИ 14 ПАҲЛАВОНИ ТОҶИК ДАР ЧЕМПИОНАТИ ҶАҲОН
12 – 14 ноябр дар пойтахти Ҷумҳурии Ӯзбекистон – шаҳри Тошканд Чемпионати ҷаҳон оид ба самбо баргузор мешавад. Ба иттилои Федератсияи байналмилалии самбо, чемпионат аз рӯйи самбои варзишӣ миёни мардону занон ва самбои размӣ миёни мардон сурат мегирад.
Тавре аз Федератсияи самбои кишвар иттилоъ доданд, Тоҷикистонро дар ин мусобиқот Акмалиддин Каримов, Хушқадам Хусравов, Муҳаммадисо Раҷабов, Ҳамроз Раҷабов, Зафар Олимшоев, Фирдавс Насимов, Хуршед Маҷидов, Шоҳида Қаландарова (самбои варзишӣ), Бобохон Мирзозода, Сорбон Латифов, Саидҷони Ҳайдар, Табрезшо Парпишоев, Фаридун Одилов ва Олимхоҷа Олимов (самбои размӣ) намояндагӣ мекунанд.
Фонди ҷоизавии Чемпионати ҷаҳон 231 000 долларро ташкил медиҳад. Ғолибон 4000 доллари ИМА, барандагони медали нуқра 3000 доллар ва биринҷӣ 2000 доллар ба даст меоранд.
Маҳмуд БАҲРОМ, шореҳи варзиш
Баёни ақида (0) Санаи нашр: №: Мутолиа карданд: 772