ТАСС. Ба иттилои хадамоти матбуоти дастгоҳи Шурои амнияти Федератсияи Россия, ширкаткунандагони машваратҳои бисёрҷонибаи котибони шуроҳои амниятӣ оид ба масъалаҳои Афғонистон, ки рӯзи чоршанбе дар Ню-Дели баргузор шуд, ба чунин хулоса омадаанд, ки  ҳузури доимии Созмони Милали Муттаҳид дар Афғонистон бояд нигоҳ дошта шавад.  СММ дар Афғонистон  нақши марказӣ ва зарурӣ мебозад.  

Иштирокдорон зарурати таъмини ҳуқуқи занон, кӯдакон ва ақаллиятҳои миллиро дар ин кишвар таъкид доштанд. Ташкили ҳукумати фарогир  шарти муҳими раванди бомуваффақияти мусолиҳаи миллӣ дар Афғонистон  мебошад, - иттилоъ медиҳад хадамоти матбуоти  дастгоҳи Шурои амнияти ФР. 

 

Неруҳои посдори сулҳи СААД якҷоя амал карданро меомӯзанд

Мир24. Дар Тотористон низомиёни кишварҳои Созмони Аҳдномаи амнияти дастаҷамъӣ  амалиёти  ҳифзи суботу оромиро тамрин мекунанд. Ин дафъа гурӯҳҳои махсуси ҳуҷумкунанда бори аввал истифода шуданд.  Дар доираи машқҳо, ҷангҷӯёни мусаллаҳи рамзӣ биноро тасарруф карда, ба атрофи он бомбаҳои худсохт гузоштанд. Низомиёни кишварҳои узви СААД  террористони рамзиро бо ёрии техникаи муосир безарар карданд. 

Амалиётҳои асосии машқҳои «Иттиҳоди шикастнопазир» дар  машқгоҳҳои низомии Мактаби олии танкии Қазон, ки дар наздикии пойтахти Тотористон воқеъ аст, баргузор мешавад. Неруҳои дастаҷамъии сулҳхоҳи СААД на танҳо мубодилаи таҷриба мекунанд, балки якҷоя амал карданро низ меомӯзанд.

 

 

Меркел хоҳони суҳбати дубора бо Путин аст

Лента.ру. Иҷрокунандаи вазифаи Канслери Олмон Ангела Меркел интизор дорад, ки Президенти Россия Владимир Путин пас аз суҳбати охирини 10 ноябр дар бораи буҳрони муҳоҷират дар марзи Беларус бо Иттиҳодияи Аврупо ба ӯ занг занад.  Ба гузориши шабакаи телевизионии РБК,  Bloomberg мутаваҷеҳи ин мавзуъ шуд. 

Ба гуфтаи ҳамсуҳбати ин нашрия, дар мақомоти Иттиҳодияи Аврупо,  гуфтугӯйи ҷадиде қабл аз шаб дар назар аст, аммо пеш аз ин Роҳбари Россия бояд ба ҳамтои белорусии худ Александр Лукашенко тамос гирад.  Меркел ба Путин паёми равшане расонд, ки ӯ бояд бо Лукашенко гуфтугӯ кунад. Қаблан хабар дода шуда буд, ки Меркел қасдан мустақим ба Президенти Беларус занг назадааст ва ба ҷойи он бо Президенти Россия тамос гирифтааст.

 

 

Бар асари пандемия 25 ҳазор тонна партов дар уқёнусҳо ҷамъ шуд

CentralAsia (CA)  Ҳангоми пандемияи COVID-19 дар уқёнусҳо зиёда аз 25 000 тонна воситаҳои муҳофизати инфиродии истифодашуда ва партовҳои пластикии марбут ба коронавирус пайдо шуданд. Ин ҳисобро олимон бо роҳбарии Имин Пэн аз Донишгоҳи Нанян анҷом дода, натиҷаҳоро дар маҷаллаи Proceedings of Academy of National Sciences нашр карданд.

Олимон ҳамчун асос маълумот-ро аз 193 кишвари ҷаҳон дар бораи партовҳои ҷамъшудаи марбут ба коронавирус гирифтаанд - инҳо ниқобҳои тиббӣ, дастпӯшакҳо ва дигар воситаҳои муҳофизати инфиродӣ, маҷмуаҳои санҷишӣ ва партовҳои беморхонаҳои ковидӣ мебошанд.

Маълум шуд, ки аз оғози пандемия то моҳи августи соли 2021 дар ҷаҳон 8,4 миллион тонна чунин партовҳо истеҳсол шудааст. Моделсозӣ нишон дод, ки, аллакай, 25 ҳазор тонна партов дар уқёнусҳои ҷаҳон мавҷуд аст.