Дар шароити кунунӣ, ки инсоният ба мушкили таъмини озуқаворӣ дучор омадааст, моҳияти ҳифз ва истифодаи оқилонаи ҳар ваҷаб замин самти афзалиятноки сиёсати давлатӣ ба шумор меравад.

 

Бо  назардошти ин омил, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамрадиф бо раҳоии кишвар аз бунбасти коммуникатсионӣ ва таъмини истиқлолияти энергетикӣ, ҳифзи амнияти озуқавориро низ ҳадафҳои стратегӣ эълом доштанд.

Ноҳияи Рашт бо мавқеи ҷойгиршавӣ ва иқлими мусоиди худ барои бунёд ва рушди соҳаи боғпарварӣ имкониятҳои хуб дорад. Меваҳои ноҳия, хусусан себу нок, бо таъму лаззати худ дар ҷумҳурӣ ва берун аз он кайҳо боз машҳуранд.

Тавре Абдураззоқ Саломов, сардори шуъбаи кишоварзии ноҳияи Рашт, зимни суҳбат гуфт, дар нуҳ моҳи соли равон истеҳсоли маҳсулоти кишоварзӣ ба 288 миллиону 197,6 ҳазор сомонӣ расида, дар қиёс ба  ҳамин давраи соли гузашта 5 миллиону 325,5 ҳазор сомонӣ зиёд аст.

Ба гуфтаи ӯ, истеҳсоли ғалладонагиҳо  4463,8 тонна, зироатҳои равғандор ҳамагӣ 636,9, сабзавот 8461,5 тонна, картошка 34 666 тонна ва мева 350,3 тоннаро ташкил дод.

Дар баробари ин, тавлидоти гӯшт, шир, тухм ва асал ба маротиб афзудааст.

- Сокинони ноҳия барои беҳтар намудани сатҳи некуаҳволӣ ва рушди соҳаи боғу токпарварӣ саъю талош варзида, ҷиҳати афзун намудани истеҳсоли маҳсулот саҳми босазои худро мегузоранд,- иброз дошт дар хотима Абдураззоқ Саломов.

 

Худодод ЗАЙНИДДИН,  “Ҷумҳурият”