Хабарҳо
“КОНСТИТУТСИЯ – САНАДИ САРНАВИШТСОЗ ВА БАХТНОМАИ МИЛЛАТИ ТОҶИК”
Бахшида ба Рӯзи Конститутсия таҳти чунин унвон дар Кумитаи бехатарии озуқаворӣ бо иштироки Муҳаммадсаид Файзуллозода, раиси кумита, Мақсуд Низомӣ, сардори сарраёсати қонунгузории Вазорати адлия, кормандони кумита ва намояндагони васоити ахбори омма ҷаласаи тантанавӣ доир гардид.
Ҳамоишро Муҳаммадсаид Файзуллозода ҳусни оғоз бахшида, аз хидматҳои камназири Пешвои миллат муҳтарам Эмомалӣ Раҳмон дар таҳия ва қабули конститутсия ёдовар шуд ва гуфт, ки он ҳамчун санади олии ҳуқуқӣ мояи ифтихор ва сарфарозии ҳар як шаҳрванди ҷумҳурӣ буда, Тоҷикистонро ба ҷаҳони мутамаддин ҳамчун давлати соҳибистиқлол, демократӣ, ҳуқуқбунёд, дунявӣ ва ягона муаррифӣ намуд. Тавассути Қонуни асосӣ, ки бо тариқи раъйпурсии халқӣ қабул шуд, мардуми тоҷик ба ҷомеаи ҷаҳонӣ эълом дошт, ки соҳиби давлати соҳибихтиёр аст ва дар роҳи ҳифзи комёбиҳо ва афзоиши онҳо пайваста кӯшиш менамояд ва барои тақвияти минбаъдаи он саъю талош меварзад.
Мақсуд Низомӣ оид ба арзишҳои волои миллӣ ва шоҳкориҳои Сарвари давлат муҳтарам Эмомалӣ Раҳмон барои рушди давлат ва миллати тоҷик ёдрас шуда, иброз дошт, ки Конститутсияи Тоҷикистон ҳамчун ифодагари азму ирода ва равшангари роҳи ҳаёти мардум, воқеан, санади тақдирсозе аст, ки низоми давлатдориро муайян намуда, ҳифзи ҳуқуқу озодиҳои инсон ва шаҳрвандро таъмин менамояд. Конститутсия, ки меъёрҳои он аз принсипи инсондӯстӣ маншаъ мегирад, ҳамчун ҳуҷҷати сарнавиштсози сиёсиву ҳуқуқӣ эътироф гардида, дар он арзишҳои муҳими ҳаётӣ, изҳори ирода ва марому мақсади кулли сокинони кишвар ба таври возеҳ инъикос ёфтаанд.
Ҳамзамон, дар ҳамоиш китоби тозанашри Вазорати адлия бо номи “Таҳаввулоти конститутсионии соҳибистиқлол” дар ин рӯзи муқаддас аз ҷониби намояндаи вазорат ба китобхонаи Кумитаи бехатарии озуқаворӣ тақдим шуд.
Дар фарҷоми чорабинӣ филми мустанади “Конститутсия – таҳкимбахшандаи Истиқлолият” пешниҳоди ҳозирон гашт.
Матлубаи АБДУҚАҲҲОР, “Ҷумҳурият”
Баёни ақида (0) Санаи нашр: №: Мутолиа карданд: 1796