Бо ташаббуси раиси шаҳри Душанбе Рустами Эмомалӣ ҳамасола ба пойтахти кишвар навъҳои гуногун ва нодири дарахтони бисёрсолаи ороишию сояафкан ворид шуда, дар шоҳроҳҳо, кӯчаву хиёбонҳо ва марказҳои фарҳангию фароғатӣ шинонда мешаванд, ки боиси афзун намудани ҳусни шаҳр мегарданд.

 

Тибқи иттилои мудири шуъбаи ободонӣ ва кабудизоркунии дастгоҳи раиси шаҳр Шералӣ Раҳмонов, дар доираи корҳои ободонӣ дар пойтахт, тибқи нақша, бояд 150 ҳазор бех ниҳол шинонда мешуд. Аммо то имрӯз, дар маҷмуъ, аз тамоми навъҳои дарахтон, аз ҷумла ниҳолу дарахту буттаҳои сояафкану ороишӣ, 226 ҳазору 354 бех, шинонда шудааст. Аз ин миқдор, дарахтони сояафкан 28 ҳазор, ороишӣ 165 ҳазору 228 бех, мевадиҳанда 20 ҳазору 333-торо ташкил медиҳанд. Баробари шинондани дарахту буттаҳо дар шаҳр ба сабз-корию васеъ намудани майдони майсазорҳо низ таваҷҷуҳи махсус зоҳир мегардад. То ин дам дар 364 ҳазору 333 метри мураббаъ майсазор бунёд шудааст.

Дар асоси қарори раиси шаҳр, раисони ноҳияҳои шаҳр, роҳбарону масъулони сохторҳои дахлдор, корхона, ташкилоту муассиса ва дигар субъектҳои хоҷагидории ҳудуди  пойтахт муваззаф гардидаанд, ки барои ба корҳои дарахтшинонию сабзкорӣ ҷалб намудани кормандони идораю муассисаҳо ва сокинони шаҳр мусоидат намуда, дар мавсими ниҳолшинонӣ саҳм гузоранд. Инчунин, дар шинондани дарахтон аз тавсияи олимону мутахассисони соҳа васеъ истифода бурда мешавад.

Рафти корҳои ободонию созандагӣ, маъракаи дарахтшинонӣ бо истифода аз қоидаҳои дурусти  агротехникӣ  ва  боду  ҳавои мусоид, тозаю озода нигоҳ доштани муҳити атроф ва мавзеъҳои сайругашти сокинон ҳамеша зери назорати раиси шаҳр қарор дорад.

Мувофиқи мушоҳидаҳо, аз шумори умумии дарахтоне, ки шинонда мешаванд, на аксари онҳо месабзанд. Бо сабаби беаҳамиятии масъулон садҳо дарахт мехушкад. Ҳол он ки ниҳолу дарахтони сабзи табиат манбаи оксигенанд. Чи қадар ниҳолу дарахтони сояафкан ва ороишӣ ё мевадор зиёд бошад, ҳавои муҳити зист аз оксиген ғанӣ мегардад. Ҳамчунин, дар фасли тобис-тон ҳавои атмоссфераро мутаъдил нигоҳ медоранд. 

Бинобар ин, ҳар сол дар ҳамин мавсим аз ҷониби Сарвари давлат муҳтарам Эмомалӣ Раҳмон иқдоми наҷибу самаровар – шинондани дарахтони сояафкану мевадиҳанда мебошад, ки бо ин восита гӯшаю канори кишварамон сабзу хуррам мегардад. 

Ин амал воқеан, барои зебоии диёрамон ва тоза нигоҳ доштани атмосфера кумак менамояд. Вале  афсӯс, ки ҳоло зарурати тараққӣ додани ҷангалу дарахтони гуногуни табиати кишвар аз ҷониби аҳолии мамлакат хуб дарк карда нашудааст. Дар самт ин корҳои фаҳмондадиҳиро миёни аҳолӣ бояд бештар кард.

 

Нигина РАҲМОН, «Ҷумҳурият»