Мардуми сарбаланду фарҳангпарвари вилояти Хатлон ду ҷашни бузург ва ифтихорӣ: 29-солагии Иҷлосияи XVI Шурои Олӣ ва Рӯзи Президенти Ҷумҳурии Тоҷикистонро таҷлил намуданд.

Бо ихлосу самимияти хос ва меҳру муҳаббати беандоза дар  симои ҳар яки шумо тамоми мардуми вилояти Хатлонро бахшида ба ин санаҳои таърихии хотирмон табрику муборакбод намуда, саодатмандию хушрӯзиро хоҳонам.

Ба ҳам рост омадани ҷашнҳои 29-солагии Иҷлосияи таърихии XVI Шурои Олӣ ва Рӯзи Президенти Ҷумҳурии Тоҷикистон аз он далолат мекунанд, ки воқеан ҳам, шахсиятҳои бузург қудрат доранд раванди инкишофи миллатҳо ва ҷомеаҳоро ба куллӣ тағйир диҳанд.

Саҳифаҳои таърих шоҳиди ҳоланд, ки аз оғоз то кунун халқи тоҷик ба такрор ба нобаробариҳои замон рӯ ба рӯ омадааст, вале забону китоб ва фарзандони фарзона, ки дошт, аз  фаношавӣ наҷот меёфт.

Исботи ин гуфтаҳо корнамоию ҷоннисориҳои фарзандони бонангу сарсупурда, ба монанди Куруши Кабир, Исмоили Сомонӣ, Спитамен, Муқаннаъ, Деваштич, Восеъ, Садриддин Айнӣ, Бобоҷон Ғафуров, Мирзо Турсунзода, Шириншоҳ Шоҳтемур, Нусратулло Махсум ва садҳо қаҳрамонони дигар имрӯз ҳам дар зеҳни мардуми мо зиндаву ҷовидон буда, бо корнамоиҳои бузург ба нафъи халқу ватанамон моро ҳидоят месозанд.

Иҷлосияи XVI Шурои Олии Ҷумҳурии Тоҷикистон, ки дар амнтарин гӯшаи Ватан, Хуҷанди бостонӣ баргузор гардид, аз ҷумлаи бузургтарин рӯйдодҳои таърихӣ мебошад, ки дар сарнавишти минбаъдаи миллати тоҷик нақши ҳалкунанда гузошт.

Бузургтарин дастоварди ин Иҷлосияи тақдирсоз он буд, ки ба бахти миллионҳо нафар тоҷикони дунё фарзанди баору номус, далеру ҷасур, покзамиру нексиришт ва дорои ифтихори баланди миллӣ муҳтарам Эмомалӣ Раҳмон ҳамчун Сарвари давлат ба майдон омаданд.

Дарвоқеъ, таърихи навини давлатдории тоҷиконро бе заҳмату талош, хизматҳои арзандаву шоистаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон тасаввур кардан имконнопазир аст.

Дар зарфи 30 соли Истиқлоли давлатӣ Ҷумҳурии Тоҷикистон, аз ҷумла шаҳру ноҳияҳои вилояти Хатлон, ба рушди устувори иқтисодӣ ноил гардида, сатҳи камбизоатӣ ба таври чашмрас коҳиш ёфт, садҳо корхонаҳои нави истеҳсолӣ, муассисаҳои замонавии таълимию тиббӣ, роҳу пулҳо, марказҳои хизматрасонии маишию фарҳангӣ бунёд, садҳо ҳазор нафар бо ҷойи кор ва маоши муносиб таъмин гардиданд.

Мардуми шарифи Тоҷикистон бо қалбҳои саршор аз муҳаббат ва садоқат дар атрофи фарзанди фарзонаи миллат, Қаҳрамони Тоҷикистон, Пешвои муътабару арҷманди худ сарҷамъ буда, савганди бо аҳду вафои Пешвои муаззами миллатро, ки саропо аз хираду фазилат иборат буд, ҳамчун савганди худ қабул карда, дар партави ҳидоятҳои шоистаи Роҳбари давлат дар самти ба даст овардани комёбиву муваффақиятҳои нав талошу кӯшиш доранд.

Имрӯз ҳамаи мо сидқан эътироф менамоем, ки мактаби ватандории Президенти мамлакат, мактаби тарбияи насли худшиносу худогоҳ, мактаби ҷасорату матонат буда, дар роҳнамоӣ намудани ҷомеа нақши муҳим дорад.

Бо назардошти ҳамаи ин, пайваста тарғибу ташвиқ намудани Рӯзи Президенти Ҷумҳурии Тоҷикистон, гиромидошти он ва хизматҳои бесобиқаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бояд вазифаи аввалиндараҷаи ҳар як фарди худогоҳ ва ватандӯсту ватанпарвар бошад.

Баргузории озмуни бонуфузи эҷодии «Тоҷикистон – хонаи умеди мо» дар соли 2020 ва озмуни имсолаи эҷодӣ «Эмомалӣ Раҳмон ва эҳёи давлатдории миллӣ» бахшида ба Ҷашни 30 - солагии Истиқлоли давлатии Ҷумҳурии Тоҷикистон ва бозтоби хидматҳои мондагори Қаҳрамони Тоҷикистон, Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз ҷониби Нашрияи расмии Ҷумҳурии Тоҷикистон – рӯзномаи «Ҷумҳурият» дар якҷоягӣ бо Мақомоти иҷроияи ҳокимияти давлатии вилояти Хатлон аз ҷумлаи чунин иқдомҳои арҷгузорӣ ба Пешвои муаззами миллат унвон мешавад.

Басо фараҳбахш аст, ки дар ин озмун ходимони барҷастаи давлатию сиёсӣ, олимону адибон, публитсистону журналистони касбӣ ва ҳамаи онҳое, ки ба эҷод алоқаманданд, фаъолона иштирок намуданд.

Аксари ин мақолаҳо фарогири дастовардҳои се даҳсолаи истиқлолият ва хидматҳои мондагори фарзонафарзанди миллат, Қаҳрамони Тоҷикистон Эмомалӣ Раҳмон дар роҳи расидан ба сулҳу ваҳдати комил, ташаккули давлатдории миллӣ, таъмини нуфузи байналмилалии Тоҷикистон дар ҷомеаи ҷаҳонӣ, саҳмаш дар нумӯи арсаҳои мухталифи хоҷагии халқ мебошанд.

 

Амонулло САЛИМЗОДА,

муовини аввали раиси 

вилояти Хатлон