Омӯзгорӣ касби пурифтихор буда, дар кишвар яке аз соҳаҳои калидӣ ба ҳисоб меравад. Пешвои муаззами миллат муҳтарам Эмомалӣ Раҳмон ҳамасола зимни ироаи Паёми хеш ба Маҷлиси Олии Ҷумҳурии Тоҷикистон барҳақ таъкид месозанд, ки ояндаи мамлакат аз фаъолияти омӯзгор ва рушди илму маориф вобастагии зиёд дорад. 

Омӯзгор дар раванди таълиму тарбия ҳуқуқи хато карданро надорад, зеро тақдири насли ояндасоз ва пешбарандаи давлату ҷомеа дар дасти ӯст. Танҳо миллати босавод метавонад насли соҳибмаърифату донишманд ва кадрҳои арзандаи давронро ба воя расонад ва дар ҷомеаи мутамаддин мақоми арзандаи худро пайдо намояд. Агар хоҳем, ки ояндаи Ватанамон шукуфон бошад, пас ба таълиму тарбияи фарзандони миллат ҷиддӣ машғул шавем. 

Бахтиёр Шарифзода дар деҳаи Чавроқи Ҷамоати деҳоти Кангурти ноҳия Темурмалик дар оилаи омӯзгор чашм ба олами хастӣ кушода, соли 1989 баъди хатми муассисаи таҳсилоти миёнаи умумии № 10 ҳуҷҷатҳояшро ба Донишгоҳи давлатии  омӯзгории  шаҳри  Кӯлоб  супурда, онро соли 1994 бо дипломи аъло бо ихтисоси омӯзгори фанни математика хатм намуд. Мавсуф фаъолияти меҳнатиашро ҳамчун омӯзгори фанни математика ва информатика дар муассисаи таълимии рақами 10 оғоз намуда, соли 2020 ба мактаб- интернати ятимону бепарасторони ноҳияи Данғара ба кор омад.

Баъди таъсис додани филиали Донишгоҳи аграрии Тоҷикистон ба номи Шириншоҳ Шоҳтемур дар ноҳияи Данғара, соли 2005 ҳамчун омӯзгори калони кафедраи фанҳои иқтисодӣ ва гуманитарӣ ба кор даъват шуд. Аз соли 2007 то 2010 дар вазифаи сардори шуъбаи таълим, солҳои 2010-2013 декани факултети иқтисодӣ, ҳамзамон аз соли 2014 то соли 2020 дар вазифаҳои омӯзгори калони кафедраи математикаи олӣ, сардори маркази бақайдгирӣ ва машваратӣ, мудири шуъбаи ғоибона, декани факултети иқтисодиёти инноватсионӣ ва менеҷмент, сардори сектори таҳсилоти фосилавӣ ва ғоибона ва декани факултети таҳсилоти фосилавӣ ва ғоибонаи Донишгоҳи давлатии Данғара фаъолият намудааст. Моҳи июли соли 2021 дар шурои диссертатсионии назди Донишгоҳи давлатии Бохтар ба номи Носири Хусрав дар мавзуи «Таърихи пайдоиши алгебра ва саҳми ниёгони тоҷикон дар инкишофи он дар асрҳои миёна» таҳти роҳбарии номзади илмҳои таърих, доктори илмҳои физика - математика, профессори кафедраи методикаи таълими физикаи Донишгоҳи давлатии Бохтар ба номи Носири Хусрав Абдулҳай Комилӣ аз рӯи ихтисоси таърихи илм ва техника рисолаи номзадиашро ҳимоя намуд. Бояд гуфт, ки кори илмии ин олими соҳаи маорифро метавон барои доираи васеи хонандагон ва ихлосмандон ҳамчун дастури таълимӣ тавсия дод. Бахтиёр Шарифзода аз моҳи июни соли 2020 то инҷониб дар мансаби мудири шуъбаи маорифи мақомоти иҷроияи ҳокимияти давлатии ноҳияи Данғара кору фаъолият карда истодааст. Аълочии маориф ва илми Ҷумҳурии Тоҷикистон мебошад.

 

Холназар КАСИРОВ, «Ҷумҳурият»