Бо ибтикори роҳбарони Муассисаи давлатии “Комиссияи олии аттестатсионии назди Президенти Ҷумҳурии Тоҷикистон” ҷиҳати баррасии тағйиру иловаҳои воридшуда ба ҳуҷҷатҳои меъёрии ҳуқуқие,  ки ба фаъолияти муассисаи мазкур иртибот дорад, дар тамоми марказҳои илмӣ ва муассисаҳои таҳсилоти  олии кишвар суҳбату вохӯриҳо, ҳамзамон, семинарҳои омӯзишӣ доир мешаванд.

Аз ҷумла,  чунин як мулоқот дар Донишгоҳи давлатии ҳуқуқ, бизнес ва сиёсати Тоҷикистон баргузор гашт. Раиси Комиссияи олии аттестатсионии назди Президенти Ҷумҳурии Тоҷикистон, доктори илмҳои таърих, профессор Абдулҳаким Розиқзода, мудири шуъбаи аттестатсионии илмҳои ҷамъиятию гуманитарии Комиссияи олии аттестатсионии назди Президенти Ҷумҳурии Тоҷикистон, доктори илмҳои ҳуқуқшиносӣ Расул Маъруфӣ, мудири шуъбаи аттестатсионии илмҳои табиӣ-риёзӣ ва техникии Комиссияи олии аттестатсионии назди Президенти Ҷумҳурии Тоҷикистон, номзади илмҳои техникӣ, дотсент Ҳайдар Гулаҳмадов, директори Донишкадаи иқтисод ва савдои Донишгоҳи давлатии тиҷорати Тоҷикистон, номзади илмҳои иқтисодӣ, дотсент Ҳомид Ҳошимзода ва  ректори Донишгоҳи давлатии ҳуқуқ, бизнес ва сиёсати Тоҷикистон, доктори илмҳои иқтисодӣ, профессор Муъмин Шарифзода, ҳамчунин профессорон – аъзои Шурои дифои назди донишгоҳ, устодону олимон ва  муҳаққиқони муассисаҳои таҳсилоти олии вилояти Суғд дар ин ҷаласа ширкат варзиданд.

Муъмин Шарифзода ҷиҳати ин вохӯрии басо муфиду судманд дар равнақи кори илмии олимони донишгоҳу муҳаққиқони муассисаҳои таҳсилоти олии вилоят ва расондани кумаки саривақтии машваратию методӣ дар самти бурдани таҳқиқоти илмӣ ва корҳои фаҳмондадиҳӣ ба Комиссияи олии аттестатсионии назди Президенти Ҷумҳурии Тоҷикистон изҳори сипос кард.

Раиси Комиссияи олии аттестатсионии назди Президенти Ҷумҳурии Тоҷикистон Абдулҳаким Розиқзода роҷеъ ба муҳимтарин раванди омодасозии кадрҳои илмӣ тавассути ҷалби мутахассисони соҳа, таҳияи мавзуъҳои илмии ба самти фаъолияти Шуро мувофиқ, ташкили кори самараноки мушовирии илмӣ аз ҷониби аъзои Шуро ва амсоли инҳо муфассал маълумот дод. Таъкид гардид, ки таъсиси Шурои мазкур падидаи муҳим дар ҳаёти илмии донишгоҳ, вилоят ва ҷумҳурӣ буда, нақши он дар раванди густариши пажӯҳишоти илмӣ, ҳамгироии илму истеҳсолот хеле муҳим мебошад.

Чунин семинари омӯзишӣ дар Донишгоҳи давлатии Хуҷанд ба номи академик Бобоҷон Ғафуров, Донишкадаи давлатии кӯҳӣ-металлургии Тоҷикистон низ бо ширкати васеи олимону устодон доир гашт.

 

Сино ҒАФУРӢ,

Корманди маркази таҳлил ва иттилооти ДДҲБСТ, шаҳри Хуҷанд