Хабарҳо
ДДЗТ: АЗ ТАЪСИСИ МАРКАЗИ TOEFL ТО ИНТИШОРИ 5 КИТОБИ МУҲИМ
Дар Донишкадаи давлатии забонҳои Тоҷикистон ба номи Сотим Улуғзода бахшида ба Рӯзи Президенти Ҷумҳурии Тоҷикистон ҳамоиши тантанавии “Дурахши ахтари дониш зи истиқлол бошад” баргузор гардид.
Нахуст, бо иштироки вазири маориф ва илми Ҷумҳурии Тоҷикистон Муҳаммадюсуф Имомзода ду толори лексионӣ барои 200 ҷойи нишаст, маркази TOEFL (тести забони англисӣ ҳамчун забони хориҷӣ) ва толори фарҳангии донишкада пас аз азнавсозӣ мавриди истифода қарор гирифт.
Ҳамчунин, меҳмонон аз шароити таҳсилу забономӯзии донишҷӯён, осорхона ва маркази тестии “Exam Preparation Center”-и факултаи забони англисӣ ва дигар марказҳои замонавии муассиса дидан карданд.
Вазир зимни суханронӣ омӯзиши забонҳои хориҷӣ, донишҳои муосир ва худшиносиву ватандӯстиро муҳим арзёбӣ намуда, изҳор дошт, ки донишҷӯёни ин даргоҳ имрӯз муаррифи Тоҷикистони азиз дар арсаи ҷаҳонанд ва дар хориҷи кишвар ҳангоми суол аз ҷавонони тоҷик аксаран мегӯянд, ки хатмкардаи донишкадаи давлатии забонҳо ҳастанд.
Ректори муассиса, профессор Жило Гулназарзода дар бораи дастовардҳои донишкада дар тули 30 соли соҳибистиқлолӣ маълумот дода, паём расонд, ки имсол як силсила дастуру китобҳои таълимӣ, монографияҳо ва барномаҳои нав нашр гардидаанд.
Дар давоми ҳамоиш китобҳои тозанашри “Фотеҳи қуллаи ормонҳои миллат”, “Энсиклопедияи Донишкадаи давлатии забонҳои Тоҷикистон ба номи Сотим Улуғзода”, “Боргоҳи забоншиносӣ аз равзанаи таърих (таърихи донишкада)”, “Донишномаи забонҳо”, “Улуғзода вафодори Ватан буд” ва “Барномаи таълимии омӯзиши забони англисӣ дар доираи барномаи умумиаврупоии забонҳои хориҷӣ (CEFR)” рӯнамоӣ шуданд.
- Китобҳои мазкур ҳосили ранҷи чандинсолаи устодону олимони донишкада буда, аз таъриху таҳаввули ин боргоҳ ва рушди забономӯзӣ дар кишвар нақл мекунанд, - афзуд Жило Гулназарзода.
Ҳамзамон, маросими ҷамъбасти озмуни якҷояи донишкада ва ҳафтаномаи “Омӯзгор” бахшида ба 110-солагии Нависандаи халқии Тоҷикистон Сотим Улуғзода роҳандозӣ гардида, ғолибони он бо диплому мукофотпулӣ қадр шуданд.
Бузургмеҳри БАҲОДУР,
«Ҷумҳурият»
Баёни ақида (0) Санаи нашр: №: Мутолиа карданд: 1512