Хабарҳо
МУҲАММАД ҒОИБ: «ДИЛ ЁФТАНУ САРҶАМЪ СОХТАНИ МИЛЛАТ ОСОН НАБУД!»
Бахшида ба Рӯзи Президент дар Донишгоҳи технологии Тоҷикистон бо иштироки роҳбарони корхонаю муассисаҳо ва ташкилотҳои ибтидоии Ҳизби Халқии Демократии Тоҷикистон таҳти унвони «Эмомалӣ Раҳмон – бунёдгузори Тоҷикистони навин» конфронси илмӣ - адабӣ баргузор гардид.
Дар ҷамъомад Муҳаммад Ғоиб, Шоири халқии Тоҷикистон, Абдураҳим Холиқзода, директори Маркази исломшиносӣ, Илҳом Амонзода, ректори Донишгоҳи технологии Тоҷикистон, доир ба паҳлуҳои гуногуни ниҳоди президентӣ ва хизматҳои мондагори Президенти мамлакат сухан ронданд.
Абдураҳим Шоҳиён, раиси Кумитаи иҷроияи ҲХДТ дар ноҳияи Фирдавсӣ, иброз дошт, ки Рӯзи Президент ба корнамоии шахсияте рост меояд, ки дар ҳассостарин айём ва вазъи муташанниҷ барои бунёди давлати соҳибистиқлоли Тоҷикистон ва барқарор сохтани сулҳу ваҳдати миллӣ хизматҳои бузург намуда, дар таърихи давлату миллат марҳилаи наверо бунёд гузоштаанд.
Ба гуфтаи Абдураҳим Холиқзода, Сарвари давлат муҳтарам Эмомалӣ Раҳмон дар як давраи басо мушкилу сангин зимоми роҳбариро бар дӯш гирифта, давоми фаъолияти пурсамарашон ба мақоми президентӣ манзалати зиёд бахшиданд. Имрӯз мақоми Президент мартабаи баландро касб намуда, саҳми он дар пешрафту шукуфоии кишвар, такмили қонунгузорӣ, робитаҳои ҳасана бо кишварҳои дуру наздик, дастгирии соҳибкорони ватанӣ, эҳёи анъанаҳои неки ниёгон, худшиносии миллӣ ва ғайра баланд эҳсос мешавад.
Шоири барҷастаи ватансаро Муҳаммад Ғоиб ба мавзуи васфи хизматҳои таърихии Пешвои миллат дар эҷодиёти шоирону нависандагони дохилу хориҷ руҷуъ намуда, иброз дошт, ки ҳар як корнамоӣ ё ибтикори пешгирифтаи Сарвари давлат аз неруи фавқулодааш дарак медиҳад ва ҳамагӣ арзандаи тавсифанд.
- Дар айёме, ки ҷаҳл боло гирифта буду яке ба дигаре гӯш намедод, Эмомалӣ Раҳмон бо ҳарфҳои самимию дилпазирашон ҳамагонро сарҷамъ карда тавонистанд. Дар чунин вазъ дил ёфтану сарҷамъ сохтани миллат осон набуд. Президенти мамлакат тули фаъолият бо ҳамин корнамоиҳои ғайриодӣ қаҳрамони сатҳи ҷаҳонӣ гардидаанд, - изҳор намуд Муҳаммад Ғоиб.
Ташрифулло САЪДУЛЛОЕВ, «Ҷумҳурият»
Баёни ақида (0) Санаи нашр: №: Мутолиа карданд: 1486