Ба ифтихори 30-солагии Истиқлоли давлатӣ ва дар доираи Солҳои рушди деҳот, сайёҳӣ ва ҳунарҳои мардумӣ дар Донишгоҳи давлатии тиббии Тоҷикистон ба номи Абуалӣ ибни Сино таҳти унвони «Дастовардҳо ва мушкилоти илми фундаменталӣ ва тибби клиникӣ» бо иштироки доираи васеи олимони ватанию хориҷӣ Конфронси байналмилалии илмӣ-амалӣ баргузор гашт. 

 

Сарвари муассиса профессор Маҳмадшоҳ Гулзода ҳамоишро оғоз бахшида, иброз дошт, ки Донишгоҳ, дар баробари омода намудани мутахассисони соҳаи тандурустӣ, дар рушди илми тиб нақши калидӣ дорад. Мактабҳои илмии он аз замони шуравӣ то инҷониб дар ҷомеаи илмии ҷаҳонӣ мақоми хоса доранд. 

Таъкид шуд, ки фаъолияти илмиву ихтироъкорӣ дар кишвар аввали солҳои соҳибистиқлолӣ ба мушкилоти ҷиддӣ рӯ ба рӯ гашт. Дар сиёсати хирадмандонаи худ Пешвои миллат муҳтарам Эмомалӣ Раҳмон илм ва маорифро самти афзалиятноки давлат эълон намуда, аз соли 2000-ум ислоҳоти тиббӣ огоз гардид, ки марҳилаи эҳё ва барқарорсозии заминаи моддию техникии озмоишгоҳҳои илмӣ ва  рушди соҳа ба ҳисоб меравад. Яке аз рӯйдодҳои муҳиме, ки соли равон шоҳиди он гаштем, бо ташаббуси  Пешвои миллат Шурои илм, маориф ва инноватсияи назди Президенти Ҷумҳурии Тоҷикистон ташкил ёфт. Мақсад аз таъсиси он, баррасии мушкилоти илм, маориф ва инноватсия ва рушди ин бахшҳо мебошад. Таваҷҷуҳи Пешвои миллат мо– олимонро водор месозад, ки дар ҳалли мушкилоти ҷойдошта ва омода намудани мутахассисони ҷавон ҷидду ҷаҳд намоем. 

Мавриди зикр аст, ки тайи солҳои соҳибистиқлолӣ аз ҷониби олимон 37 лоиҳаи илмӣ амалӣ гардида, таҳти роҳбарии онҳо 586 рисолаи илмии номзадӣ ва 73 рисолаи докторӣ ҳимоя гардид, ки нишондоди назаррас мебошад.

Муовини якум вазири тандурустӣ ва ҳифзи иҷтимоии аҳолӣ Ғафур Муҳсинзода дастгирии Ҳукумати мамлакатро дар рушди илми тиб баланд арзёбӣ кард, ки дар пайи ин имконияти табобати бемориҳои гуногун фароҳам омадааст. Ба таъкиди ӯ, аз худ намудани навгониҳои илмӣ ва истифодаи онҳо дар таҷрибаи амалӣ яке аз вазифаҳои аввалиндараҷа ба ҳисоб меравад. Солҳои ахир даҳҳо кафедраю озмоишгоҳ ва клиникаҳо бо дастгоҳҳои муосир фаъолият менамоянд. Тули фаъолияти 80-солаи Донишгоҳ беш аз 45 ҳазор мутахассиси соҳа тарбия ёфт, ки дар дохил ва хориҷи кишвар кор мекунанд. 

Виктор Олшавский,  намояндаи Ташкилоти ҷаҳонии тандурустӣ, аз он ки илми тиб дар кишвар рушд мекунад, изҳори хушнудӣ намуда, вобаста ба самтҳои афзалиятноки илм гузарондани тадқиқотҳоро иқдоми нек хонд.  

Вазири маориф ва илм Муҳаммадюсуф Имомзода ба сатҳи байналмилалӣ мутобиқ гардондани системаи омӯзиши илмҳои тибро яке аз дастовардҳои муҳимтарини Донишгоҳ арзёбӣ карда, аз кори табибон дар давраи пандемияи коронавируси идомадошта ситоиш кард: «Кори шумо бебаҳою камназир аст. Дар ин давраи мушкил шумо ба савганди худ содиқ мондед. Халқ инро фаромӯш намесозад». 

 

Меҳрангез ҚОДИРОВА, «Ҷумҳурият»