мулоқотҳо
МУЛОҚОТИ ЭМОМАЛӢ РАҲМОН БО ҶОЗЕП БОРРЕЛЛ
22 ноябр дар Қасри миллат Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Намояндаи олии Иттиҳоди Аврупо оид ба сиёсати хориҷӣ ва амниятӣ Ҷозеп Борреллро, ки бо сафари расмӣ ва барои иштирок дар ҷаласаи вазирони корҳои хориҷии Осиёи Марказӣ ва Иттиҳоди Аврупо дар Тоҷикистон қарор дорад, ба ҳузур пазируфтанд.
Дар вохӯрӣ масоили ҳамкориҳои Тоҷикистону Иттиҳоди Аврупо мавриди баррасӣ қарор гирифтанд. Президенти мамлакат муҳтарам Эмомалӣ Раҳмон таъкид доштанд, ки густариши муносибатҳои Тоҷикистону Иттиҳоди Аврупо ба пешрафти кишвари мо ва тамоми минтақа мусоидат хоҳад кард.
Ҷонибҳо, инчунин, масъалаҳои таҳкими ҳамкорӣ дар бахшҳои сиёсӣ, тиҷоративу иқтисодӣ ва иҷтимоӣ, сармоягузорӣ ва татбиқи лоиҳаҳоро дар соҳаҳои мухталифи гуманитарию фарҳангӣ, бахусус маориф, тандурустӣ ва рушди маҳал, матраҳ намуданд.
Зимни баррасии заминаи ҳуқуқии муносибатҳо барои таҳкими минбаъдаи робитаҳо, имзои созишномаи мукаммали ҳамкорӣ ва шарикии Тоҷикистону Иттиҳоди Аврупо зарур шумурда шуд.
Дар мулоқот, ҳамчунин, оид ба ҳамкории ҷонибҳо дар самти рафъи оқибатҳои пандемияи коронавирус, масоили истифодаи пурсамари захираҳои об, мушкилоти тағйирёбии иқлим ва ҳифзи пиряхҳо табодули андеша сурат гирифт.
Президенти мамлакат муҳтарам Эмомалӣ Раҳмон аз номи Ҳукумат ва мардуми Тоҷикистон ба ҷониби Иттиҳоди Аврупо барои ба Тоҷикистон расондани кумак баҳри рафъи оқибатҳои иқтисодиву иҷтимоии паҳншавии вируси COVID – 19 ва тақвияти соҳаи тандурустӣ ба маблағи беш аз 112 миллион евро миннатдории амиқ баён доштанд.
Сарвари давлати мо, инчунин, ба Иттиҳоди Аврупо ва кишварҳои аъзо барои дастгирии ташаббусҳои глобалии Тоҷикистон оид ба масъалаҳои об ва тағйирёбии иқлим, ки ба яке аз мушкилоти ҷиддии замони муосир мубаддал гаштааст, изҳори сипос карданд.
Ҷонибҳо аз раванди рушди устувори робитаҳои Тоҷикистону Иттиҳоди Аврупо қаноатмандӣ намуда, ба масъалаҳои густариши робитаҳо дар бахшҳои иқтисодӣ, тиҷоратӣ, сармоягузорӣ, афзоиши содироту воридот таваҷҷуҳ зоҳир намуданд. Дар зимн, тасмим ва ҳавасмандии Тоҷикистон дар бораи пайвастан ба Низоми имтиёзҳои гумрукӣ дар содироти молу маҳсулот ба Аврупо таъкид гардид.
Ҳангоми вохӯрӣ ба таҳкими амнияту субот дар Тоҷикистон, тамоми минтақаи Осиёи Маркаӣ ва Афғонистон таваҷҷуҳ зоҳир шуд.
Талошҳои судманди муштараки ҷонибҳо дар ин арса, бахусус таҳкими ҳифзи сарҳади Тоҷикистону Афғонистон, тавассути татбиқи барномаҳои БОМКА ва КАДАП, сохтмони роҳҳои мошингард, пул, хатти интиқоли барқ ва бунёди иншооти дигар дар манотиқи марзӣ бо ин кишвар зикр гашт.
Ҳамзамон, зимни мулоқот, дар доираи муколамаи сатҳи баланди амниятиву сиёсӣ, оид ба нақши Анҷумани иқтисодӣ, Форуми ҷомеаи шаҳрвандӣ ва Стратегияи нави Иттиҳоди Аврупо барои Осиёи Марказӣ мубодилаи афкор сурат гирифт.
Дар фарҷом изҳори бовар шуд, ки ҳамкориҳои гуногунҷанбаи Тоҷикистон бо Иттиҳоди Аврупо дар оянда низ пайгирона густариш хоҳанд ёфт.
Баёни ақида (0) Санаи нашр: 23.11.2021 №: 235 Мутолиа карданд: 4306