Хабарҳо
ФУРӮҒИ ВАТАНДОРӢ
Дар ҳама давру замон давлатдорон парчамро ҳамчун рамзи асосии давлатдорӣ мепиндоштанд ва чун сарҳад, забон, фарҳанг муқаддас меҳисобиданд. Имрӯз ҳам мо – мардуми сарбаланди тоҷик парчамро эҳтиром мегузорем ва ҳамасола 24 ноябр дар саросари Тоҷикистони азиз Рӯзи Парчами давлатӣ бо шукӯҳу шаҳомати хосса таҷлил мегардад.
Дар Нуробод низ ин рӯзро бо тантана пешвоз гирифтанд. Ба ин хотир дар толори Мақомоти иҷроияи маҳаллии ҳокимияти давлатӣ бо иштироки раиси ноҳия Додарҷон Ҷобирзода, кормандони шуъбаи маориф, тандурустӣ ва нафарони касбу кори гуногун чорабинӣ доир гардид.
Додарҷон Ҷобирзода дар оғози чорабинӣ Рӯзи Парчамро ба ҳозирон муборак гуфт. Таъкид гашт: «Парчами давлатӣ, ҳамчун рамзи соҳибистиқлолӣ, ваҳдату якдилӣ ва муттаҳидии миллат парафшон буда, аз давлати соҳибистиқлолу демократӣ, озоду дунявӣ ва ягонаамон мужда медиҳад. Парчами давлатӣ барои ҳар як халқу миллат, аз ҷумла барои мо - тоҷикон, муқаддас аст, зеро дар тули таърих ҷиҳати ҳифзи он абармардони миллат ҷонбозиҳо намудаанд. Дар ҳақиқат, рамзҳои давлатӣ, бахусус, Парчам дар ҳар давру замон муаррифгари халқу миллат аст. Доир ба муқаддас будани Парчам устодони сухан, олимон, аҳли қалам асарҳову достонҳо эҷод намудаву зери ин ливои муқаддас наслҳои гуногуни ҷамъиятро ба нангу номуси ватандорӣ, муттаҳидӣ, ободию осудагӣ, нигоҳ доштани марзу бум, гиромӣ доштани Меҳан ҳидоят намудаанд».
Бояд гуфт, ки дар ноҳияи Нуробод бо ҳидоятҳои Пешвои муаззами миллат муҳтарам Эмомалӣ Раҳмон моҳи сентябри соли ҷорӣ дар боғи фарҳангиву фароғатии шаҳраки Дарбанд Парчами давлатӣ бо баландии 50 метр қомат афрохт. Сокинони ноҳия бо дарки масъулияти баланди шаҳрвандӣ, бо ифтихор аз Парчами давлатӣ баҳри пешрафту шукуфоии кишвари азизамон саъю талош меварзанд.
Гулнисои САЪДОНШО, “Ҷумҳурият”
Баёни ақида (0) Санаи нашр: №: Мутолиа карданд: 1575