Хабарҳо
РӮЗИ ПАРЧАМИ ДАВЛАТӢ. ҲАМОИШИ ҶАШНӢ ДАР ДМТ
Таҳти ҳамин унвон Донишгоҳи миллии Тоҷикистон дар якҷоягӣ бо Кумитаи иҷроияи ҲХДТ дар ноҳияи Шоҳмансур ва Федератсияи Иттифоқҳои касабаи мустақили Тоҷикистон бахшида ба Рӯзи Парчами давлатӣ ва
65 – умин солгарди таъсисёбии нашрияи донишгоҳии «Ба қуллаҳои дониш» ҷаласаи тантанавӣ доир намуд.
Қобилҷон Хушвахтзода, ректори ДМТ, аҳли нишастро ба Рӯзи Парчами давлатии Ҷумҳурии Тоҷикистон таҳният гуфта, таъкид намуд, ки Парчами давлатӣ дар баробари Конститутсия, Нишон ва Суруди миллӣ рамзи муқаддаси давлат ва нишонаи соҳибихтиёрии миллат дониста шуда, дар мақоми худ равшангари таърих, сарнавишти миллату давлат, инъикосгари фарҳангу тамаддун маҳсуб меёбад.
Мавсуф, инчунин, тазаккур дод, ки нашрияи «Ба қуллаҳои дониш» - и Донишгоҳи миллӣ манбаи хуби иттилоърасонӣ ба кулли устодону кормандон ва алоқамандони донишгоҳ мебошад. Таҳлилҳо нишон медиҳанд, ки нашрия дар байни расонаҳои муассисаҳои Тоҷикистон аз лиҳози мавзуву муҳтаво мавқеи хосро дорост.
Маликшо Неъматзода, раиси Федератсияи Иттифоқҳои касабаи мустақили Тоҷикистон, дар робита ба Рӯзи Парчам ва дастовардҳои варзишгарони мамлакат сухан ронда, зумрае аз ҷавонон, аз ҷумла Акмалиддин Каримовро, ки дар Чемпионати ҷаҳон оид ба самбо (12 -14 ноябр, Ӯзбекистон) ба ҳама рақибонаш пирӯз шуда, қаҳрамони ҷаҳон гардид, бо сипоснома ва мукофоти пулӣ қадр кард.
- Парчами давлатӣ тамоми сокинони кишварро бо ифтихор аз давлату давлатдорӣ, таҳкими Истиқлолияти миллӣ, ҳифзи дастовардҳои он ва, пеш аз ҳама, ваҳдати миллӣ ва кӯшишу талоши пайваста ба хотири ободию осудагии сарзамини аҷдодӣ раҳнамун месозад. Бо шунидан ва ба забон овардани вожаҳои Ватан, Парчам, Нишон, Суруди миллӣ, забони давлатӣ, Президент, марзу буми Тоҷикистон касро беихтиёр ҳисси меҳанпарастию ифтихор аз Ватану ватандорӣ фаро мегирад ва чунин эҳсосоти гарм, махсусан дар замони соҳибистиқлолии Ҷумҳурии Тоҷикистони азиз, зери Парчами давлатӣ боз ҳам фараҳбахшу гуворо ба ҷилва меоянд, - гуфт Саъдӣ Маҳдӣ, директори Академияи ВАО.
Лола РИЗОӢ,«Ҷумҳурият»
Баёни ақида (0) Санаи нашр: №: Мутолиа карданд: 1456