Мо бояд ҳамеша аз Истиқлолияти давлатӣ ва ваҳдати миллӣ, ки аз ҷумлаи муқаддасоти ҷовидонӣ мебошанд, шукрона карда, онҳоро чун гавҳараки чашм эҳтиёт ва ҳифз намоем.

Эмомалӣ Раҳмон

 

Боиси ифтихор ва сарфарозист, ки сӣ сол пеш миллати соҳибфарҳангу тамаддунсози мо ба дастоварди бузург ва муқаддас-Истиқлолияти давлатӣ ноил гардид.

Дар марҳалаи нави давлату давлатдорӣ тибқи Конститутсияи нави мамлакат асосҳои сохтори ҷомеа ва давлат, инчунин, идоракунии он танзим гардида, ҳуқуқу озодӣ ва вазифаҳои асосии шаҳрвандон муайян карда шуданд.

Дастовардҳои бузургтарини мамлакат дар ин муддат барқарор намудани сулҳу суботи комил ва ваҳдати пойдори миллӣ, таъмини рушди устувори иқтисодиву иҷтимоӣ, таҳкими худшиносиву худогоҳӣ, болоравии ҳисси ватандӯстиву ватандорӣ дар миёни тамоми табақаҳои ҷомеаи Тоҷикистон ба шумор меравад. 

Таҳти роҳбарии Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар давоми сӣ соли истиқлолият бо вуҷуди бисёр мушкилоту монеаҳо таҳкурсии давлати соҳибихтиёр гузошта шуд ва чор ҳадафи муҳимтарини миллӣ - таъмини истиқлолияти энергетикӣ, аз бунбасти коммуникатсионӣ баромада, ба кишвари транзитӣ табдил ёфтан,  таъмин намудани амнияти озуқавориву дастрасии аҳолӣ ба ғизои хушсифат ва саноатикунонии босуръати кишвар давра ба давра дар амал татбиқ шуда истодааст.

Ҳамаи тадбирҳое, ки бо ҳидояти Пешвои миллат дар роҳи созишу ваҳдати миллӣ, дар самти навсозии низоми қонунгузорӣ ва ҳокимияти давлатӣ бар пояи барномаҳои Ҳукумати Тоҷикистон роҳандозӣ шуданд, ҳадафи онро доранд, ки кишвари азизи мо ба шоҳроҳи тамаддуни ҷаҳони имрӯза ворид ва мардум соҳиби зиндагии осудаву обод гардад. 

Бо ин мақсад, давлат ва Ҳукумати Тоҷикистон таваҷҷуҳи асосиро ба рушди устувори иқтисоди миллӣ, тақвияти истеҳсолот, содироти маҳсулоти тайёр бо роҳи ворид намудани технологияҳои нав, сохтмони роҳҳо ва корхонаҳои хурду калони истеҳсолӣ равона карда, то имрӯз дар ин самт ба дастовардҳои назаррас ноил гардидааст.

Шукронаи он дорем, ки Истиқлолияти давлатӣ мо - ҷавонони замони истиқлолиятро ба сӯйи асолат ва ҳувияти миллӣ раҳнамоӣ ва дар руҳияи ватандӯстиву ифтихори миллӣ, садоқат ба анъанаву суннатҳои аҷдодӣ, арҷ гузоштан ба арзишҳои таърихиву фарҳангии ниёгон ҳидоят мекунад.

Бинобар ин, мо - ҷавонон бо дарки масъулияти баланди ватандорӣ ҳадафҳои созандаву ободкории Пешвои муаззами миллатро қарзи инсонӣ ва шаҳрвандии худ шумурда, бо кору амали неки ҳаррӯзаамон садоқати хешро барои ободонии Ватани азизамон собит менамоем.   

 

Шоҳин ВАЛИЗОДА,

ёрдамчии судяи Суди конститутсионии Ҷумҳурии Тоҷикистон