Хабарҳо
С А Н О А Т . МАҲСУЛОТИ ВАТАНӢ ИФТИХОРИ МАНУ МО
Дар Муассисаи давлатии «Кохи Борбад» маросими тантанавии супурдани ҷоизаҳо ба ғолибони озмуни «Маҳсулот ва хизматрасонии беҳтарин дар Ҷумҳурии Тоҷикистон» баргузор гардид. Дар ҳамоиш Муҳиддин Панҷшанбезода, мушовири бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, Исоҷон Қурбонзода, сардори раёсати инфрасохтори Дастгоҳи иҷроияи Президенти Ҷумҳурии Тоҷикистон, Темурҷон Абдулваҳҳобзода, директори Агентии "Тоҷикстандарт" иштирок намуданд.
Нахуст, маросими намоиш-фурӯши молу маҳсулоти ватанӣ доир гардида, соҳибкорон намунаи маҳсулот ва хизматрасониҳои худро пешкаши сокинону меҳмонон намуданд. Ҳамзамон, маҳсули дасти ҳунармандон низ ба намоиш гузошта шуд, ки дар фазои идона бо эҳсоси гарми ватандорию шукргузорӣ аз амонию осудаҳолӣ хеле хотирмон буд.
Озмуни «Маҳсулот ва хизматрасонии беҳтарин дар Ҷумҳурии Тоҷикистон» дар доираи Ҷашни 30-солагии Истиқлолияти давлатии Ҷумҳурии Тоҷикистон ва татбиқи дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба тақвияти истеҳсолоти воридотивазкунанда ва рушди содирот, таъмини бозори истеъмолӣ бо молҳои баландсифат ва рақобатпазири ватанӣ, мусоидат ба саноатикунонии босуръати кишвар доир гардид. Мавриди зикр аст, ки озмуни мазкур аз соли 2008 инҷониб дар ду сол як маротиба гузаронда мешавад.
Дар маросими ҷоизасупорӣ ба ғолибон Муҳиддин Панҷшанбезода, мушовири бахши ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа, аз номи Ҳукумати мамлакат соҳибкоронро бо ин муваффақиятҳояшон шодбош намуда, ҷиҳати дар оянда боз ҳам беҳтар намудани сифат ва рақобатпазирии маҳсулоти ватанӣ ва саҳм гузоштан дар рушди иқтисодии мамлакат изҳори андеша намуд.
Боиси тазаккур аст, ки озмуни мазкур дар ду давр доир шуда, дар он 290 корхона ва ташкилоти хизматрасон дархост пешниҳод намуда буданд. Дар натиҷаи хулосаи комиссия, 116 корхонаю ташкилот ба даври ҷумҳуриявӣ роҳ ёфтанд. Он аз рӯи чунин номгӯҳо – маҳсулоти хӯрокворӣ, маҳсулоти саноатӣ, ҳунарҳои мардумӣ, маҳсулоти таъиноти истеҳсолию техникӣ ва хизматрасонии хӯроки умумӣ ва хизматрасонии нуқтаҳои савдо гузаронда шуд.
Дар анҷом ба ғолибон диплом ва туҳфаҳои хотиравӣ тақдим шуд.
Матлубаи АБДУҚАҲҲОР, “Ҷумҳурият”
Баёни ақида (0) Санаи нашр: №: Мутолиа карданд: 1649