Ба истиқболи Рӯзи Парчами давлатӣ дар муассисаю ташкилотҳо ва марказҳои деҳоти ноҳия чорабиниҳои бошукӯҳи идона баргузор мешаванд. Аз ҷумла,  дар яке аз қисмҳои низомии  Вазорати мудофиа дар минтақаи Рашт бо иштироки  гурӯҳи кории Мақомоти иҷроияи маҳаллии ҳокимияти давлатии ноҳияи Лахш ва сарбозону афсарон  ҷамъомади тантанавӣ баргузор гардид. 

Файзулло Баротзода, раиси ноҳия, иброз дошт, ки Парчам рамзи давлату давлатдорӣ буда, шаҳрвандонро ба ҳимояи Ватан, зиндагии ором, сулҳу осоиштагӣ, рушду нумӯ ва таҳкими пояҳои соҳибихтиёрию соҳибдавлатӣ раҳнамун месозад. Парчам таҷассуми мубориза барои озодӣ ва истиқлол, бахту иқболи сафед, ояндаи дурахшон ва саъю кӯшиши халқ барои сарсабзию хуррамии мамлакат мебошад. Аз ин рӯ, гиромидошти эътибору манзалати он ҳамчун муқаддасоти бузурги миллӣ ба маънои ҳимояту пуштибонии давлату давлатдорӣ маҳсуб мешавад.

Зикр гардид, ки чорабиниҳои тантанавӣ ба хотири таҷлили ин санаи муҳими давлатдорӣ аз ҷониби Мақомоти иҷроияи маҳаллии ҳокимияти давлатии ноҳияи Лахш дар дигар гӯшаю канори ноҳия ва қисмҳои ҳарбии он мунтазам ба роҳ монда мешаванд. Ҳамзамон, байни ҷавонону наврасон мусобиқаҳои шоҳмот, шашка ва футбол доир мегарданд. Гурӯҳи кории Мақомоти иҷроияи маҳаллии ҳокимияти давлатии ноҳия дар муассисаҳои таълимию миёнаи касбӣ вохӯриҳо гузаронда, дар онҳо доир ба аҳамияти   парчам, ки яке рукнҳои муҳими давлатдорӣ ба шумор меравад, суханронӣ намуданд.

 

Ташрифулло САЪДУЛЛОЕВ,  «Ҷумҳурият»