«Ал-Ҳилол» бори чорум чемпион шуд

Дар финали Лигаи қаҳрамонҳои КФО- 2021 дастаи «Ал-Ҳилол» (Арабистони Саудӣ) бар «Пхохан Стилерс» (Корея) ба ҳисоби 2:0 ғалаба карда, бори чорӯм (1991/92, 1999/2000, 2019) унвони чемпиониро ба даст овард. 

Бар пояи иттилои сомонаи мусобиқот, тӯбҳоро Носир Ад-Досарӣ (дақ.1) ва Мусо Марега (дақ.63) ба самар расонданд.

 

ЛИГАИ ОЛӢ 

«Истиқлол» - бори 10-ум қаҳрамони Тоҷикистон

«Истиқлол» баъд аз шикаст додани «Душанбе» (8:0) дар даври 25-ум ду давр пеш аз анҷоми Чемпионати Тоҷикистон оид ба футбол миёни дастаҳои Лигаи олӣ бо касби 61 хол қаҳрамони Тоҷикистон шуд. Қаблан, душанбегиҳо солҳои 2010, 2011, 2014, 2015, 2016, 2017, 2018, 2019 ва 2020 унвони чемпиониро ба даст оварда буданд. 

«Хуҷанд» бо 51 хол мавқеи дуюмро гирифт.

Барандаи медалҳои биринҷӣ дар даври охир муайян мегардад.

Тими «Душанбе» (18 хол) дар зинаи охири ҷадвал қарор дошта, мавсими оянда аз Лигаи олӣ хориҷ мешавад. 

 

«ABU DHABI GRAND SLAM»

Тоҷикистонро 10 паҳлавон муаррифӣ мекунад

Дар охир мусобиқоти сайри ҷаҳонии дзюдо – «Abu Dhabi Grand Slam» (26 – 28 ноябр, АМА) Тоҷикистонро Шаҳбоз Саидаброров, Алиҷон Сафаралиев, Баҳром Суфиев, Муҳаммадраҳим Сарахонов, Сомон Маҳмадбеков, Ҳақназар Назаров, Хушвақт Идиев, Ҷаҳонгир Маҷидов, Комроншоҳ Устопириён ва Темур Раҳимов намояндагӣ мекунанд.

Тибқи иттилои Федератсияи байналмилалии дзюдо, дар мусобиқа 232 варзишгар (144 мард, 88 зан) аз 42 давлат иштирок мекунанд.

Ба ғолибон 5000 доллари ИМА ва барандагони нишонҳои нуқра ва биринҷӣ мутаносибан 3000 ва 1500 - долларӣ дода мешавад. 

 

Маҳмуд БАҲРОМ, шореҳи варзиш