ОДАМКУШӢ

Боздошти зане, ки шавҳарашро бо зарби табар кушт

Кормандони мақомоти корҳои дохилӣ дар ноҳияи Ҷалолиддини Балхӣ зани 36-солаеро боздошт намуданд, ки дар содир намудани ҷинояти одамкушӣ гумонбар мешавад.

Тибқи иттилои дафтари матбуоти Вазорати корҳои дохилӣ, боздоштшуда сокини Ҷамоати шаҳраки Гулистони ҳамин ноҳия буда, 18 ноябри соли ҷорӣ шавҳарашро, ки аз ӯ марди 40-сола ном бурда мешавад, бо зарби табар шадидан маҷруҳ кардааст. Дар натиҷа, ҷабрдида ҷароҳатҳои вазнини ҷисмонӣ бардошта, дар беморхона ба ҳалокат расидааст.

Ҳодиса дар пайи муноқишаи оилавӣ сар зада, ҳоло аз рӯйи он тафтишот идома дорад. 

 

 

ҚАЛЛОБӢ

Корманди милитсияро ба толори суд бурд

Маркази матбуоти Агентии назорати давлатии молиявӣ ва мубориза бо коррупсия хабар дод, ки парвандаи ҷиноятӣ нисбат ба Умед Комилов баъд аз анҷоми тафтиши пешакӣ бо тасдиқи фикри айбдоркунӣ барои моҳиятан баррасӣ намудан ба суд ирсол шуд.

Тибқи иттилои манбаъ, Умед Комилов ба он айбдор мешавад, ки ҳамчун ваколатдори шуъбачаи кофтукови ҷиноятии ШВКД дар ноҳияи Шамсиддин Шоҳин бо мақсади ғаразнок ва бо истифодаи мақоми хизматӣ аз шаҳрванд «А» барои гӯё нисбаташ оғоз накардани парвандаи ҷиноятӣ 10000 сомонӣ гирифтааст.

Вобаста ба ин ҳолат, алайҳи ӯ бо моддаи 247 қисми 3 банди «а» Кодекси ҷиноятӣ (қаллобӣ ба миқдори калон) парвандаи ҷиноятӣ оғоз шудааст, ки ин банди қонун ҷазои ҷирима ба андозаи аз нуҳсаду дувоздаҳ то як ҳазору чорсаду шаст нишондиҳанда барои ҳисобҳо ё маҳрум сохтан аз озодӣ ба муҳлати аз панҷ то ҳашт солро пешбинӣ менамояд.

 

ДУЗДӢ

Чорводуздон ба даст афтоданд

Дар ноҳияи Кӯшониёни вилояти Хатлон кормандони милитсия ду мардеро боздошт карданд, ки ба дуздии чорво гумонбар мешаванд.

Тавре сомонаи ВКД хабар медиҳад, дастгиршудаҳо 16 ноябри соли 2021 аз заминҳои чарогоҳи Ҷамоати деҳоти Навбаҳори ноҳияи Кӯшониён 2 сар чорвои майдаро дуздидаанд.

Зарари расондашуда 3200 сомониро ташкил дода, дар робита ба ин тафтишот оғоз шудааст. 

 

Шуъбаи ҳуқуқи рӯзномаи «Ҷумҳурият»