Лента.ру. Президенти Россия Владимир Путин  бо раиси Шурои Аврупо Шарл Мишел зимни суҳбати телефонӣ вазъи марзи Беларус ва Лаҳистонро баррасӣ кард, - хабар медиҳад хадамоти матбуоти Кремл.

Роҳбари Россия ва раиси Шурои Аврупо ба аҳамияти ҳалли буҳрони муҳоҷират дар заминаи ҳуқуқи башари байналмилалӣ таваҷҷуҳ карданд. Путин муътақид аст, ки таҳримҳои ҷоригардида алайҳи Беларус самарабахш нестанд. Илова бар ин, Путин ва Мишел вазъи Украина, Қариябоғ, Афғонистон ва Либияро баррасӣ намуданд. 

Пештар Дмитрий Песков, сухангӯи Кремл гуфт, ки иртиботи президентҳои Россия ва Беларус Владимир Путин ва Александр Лукашенко барои ҳалли буҳрони муҳоҷират кофӣ нестанд, зарур аст, ки равобити Минск ва Иттиҳоди Аврупо идома ёбад.

 

Президенти Ӯзбекистон  ва муовини Дабири кулли СММ амнияти минтақавиро баррасӣ намуданд

CentralAsia (UZ). Президенти Ӯзбекистон Шавкат Мирзиёев муовини дабири кулли Созмони Милали Муттаҳид, директори иҷроияи Раёсати СММ оид ба маводи мухаддир ва ҷинояткорӣ Гаду Валиро, ки бо  сафари корӣ дар ин кишвар қарор дорад, ба ҳузур пазируфт. Масъалаҳои мубрами ҳамкорӣ дар соҳаи мубориза бо мушкилоти муосир ва таҳдидҳо ба амнияти ҷаҳониву минтақавӣ баррасӣ шуданд, -гуфт хадамоти матбуоти Сарвари давлати Ӯзбекистон. 

Дар ин сафар Гади Вали барномаи нави ҳамкориҳои минтақавии кишварҳои Осиёи Марказӣ барои солҳои 2022-2025-ро қабул кард, ки иҷрои чорабиниҳо ва лоиҳаҳои муштаракро дар панҷ самти афзалиятнок ба маблағи 90 миллион доллар пешбинӣ мекунад. Ба тағйирёбии вазъ дар минтақа, аҳамияти талошҳои ҳамоҳангшудаи байналмилалӣ ҷиҳати пешгирии буҳрони  гуманитарӣ дар Афғонистон ва расондани кумакҳо ба ин кишвар таваҷҷуҳи хоса зоҳир гардид.

 

Мишустин дар ҷаласаи Шурои сарварони ҳукуматҳои СҲШ ширкат меварзад

ТАСС.  Сарвазири Россия Михаил Мишустин имрӯз дар ҷаласаи Шурои сарварони ҳукуматҳои кишварҳои узви Созмони ҳамкории Шанхай (СҲШ) ширкат хоҳад кард, - хабар медиҳад дафтари матбуоти ҳукумат.

Қарор аст, роҳбарони ҳукуматҳо доираи васеи масъалаҳои рушди ҳамкориҳоро дар чаҳорчӯбаи ин созмон баррасӣ намуда, ба тавсеаи ҳамкориҳо дар бахшҳои тиҷоративу иқтисодӣ, сармоягузорӣ ва гуманитарӣ, аз ҷумла, дар заминаи рафъи оқибатҳои он, таваҷҷуҳи хосса зоҳир намоянд.

Ҷаласаро сарвазири Қазоқистон Аскар Мамин  раисӣ мекунад.  Он дар пойтахти  Қазоқистон дар шакли видеоконфронс баргузор мегардад. Дар нишаст сарварони ҳукуматҳои Россия, Чин, Қирғизистон, Тоҷикистон ва Ӯзбекистон ширкат мекунанд. Ҳиндустон ва Покистонро вазирони корҳои хориҷӣ  намояндагӣ менамоянд. Беларус, Эрон ва Муғулистон, ки кишварҳои нозир мебошанд, низ ба ин кор ҳамроҳ мешаванд.