Дар ифтитоҳи иншоот Дилмурод Давлатзода, директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон, Муҳаммаддовуд Саломиён, муовини якуми вазири маориф ва илми ҷумҳурӣ, Амонулло Салимзода, муовини якуми раиси вилояти Хатлон, Қиёмиддин Миралиён, раиси Кумитаи иҷроияи Ҳизби Халқии Демократии Тоҷикистон дар вилояти Хатлон, Исломиддин Раҳмон, раиси ноҳия, сокинон, омӯзгорону хонандагон ва дигарон иштирок доштанд.

Иншоотро дар заминаи дастуру ҳидоятҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оилаи Давлатовҳо бо тарҳи зебову замонавӣ аз таъмири асосӣ бароварда, бо шароити мусоиди таълим таъмин намуданд. Муассиса якошёна буда, дорои сездаҳ синфхона, дафтарҳои корӣ, толор ва осорхона мебошад. Чароғакҳои равшанидиҳанда, роҳравҳои асфалту сафолакпӯш аз корҳои дигари ободонӣ дар муассиса ба шумор мераванд. Муассиса бо системаи гармидиҳии буғӣ таъмин мебошад. Имкон пайдо шуд, ки муассиса беш аз 500 хонандаро дар ду баст ба таълиму тарбия фаро гирад. Бо бунёди бинои иловагӣ шароити таълим дар муассиса беҳтар гашт.

Мудири маорифи ноҳия Бахтиёр Шарифзода иброз дошт, ки дар деҳа бо назардошти афзоиши аҳолӣ, ки зиёда аз 6000 нафарро ташкил медиҳад хонандагон аз норасоии ҷойи нишаст танқисӣ мекашиданд. Ҳоло, бо таъмири иншооти таълимӣ барои хонандагони синфҳои ибтидоӣ мушкилии ҷойдошта бартараф гардид. Бинои иловагии таълимӣ баҳри татбиқи яке аз ҳадафҳои асосии Ҳукумати Ҷумҳурии Тоҷикистон – таъмини пешрафти соҳаи маориф ва фароҳам овардани шароити муосир барои омӯзиш бунёд гардид. 

Меҳмонон зимни шиносоӣ бо шароити таълим дар муассиса ба корҳои сохтмонӣ баҳои баланд дода,  ба оилаи  Давлатовҳо  ва  дигар шахсоне, ки дар ин кор саҳм гузоштаанд барои дастгирӣ аз сиёсати маорифпарваронаи Сарвари давлат муҳтарам Эмомалӣ Раҳмон миннатдорӣ баён карда, муассисаи таълимиро беҳтарин туҳфа арзёбӣ карданд. 

- Қомат афрохтан ва аз таъмир баровардани муассисаҳои таҳсилоти миёнаи умумӣ ва синфхонаҳои иловагӣ дар шаҳраку деҳотҳои ноҳия дар доираи Барномаи давлатии рушди муассисаҳои соҳаи маорифи вилояти Хатлон барои солҳои 2017 – 2021 ва Ҷашни 30 – солагии Истиқлоли давлатӣ сурат гирифта, имкон медиҳад, ки хонандагон дар шароити муосир донишҳои замонавиро аз худ намоянд ва оянда беҳтарин мутахассис, кордону коршиносони замони хеш бошанд, - мегӯяд Бахтиёр Шарифзода. 

Ба гуфтаи мудири маорифи ноҳия ҳоло аз ҳисоби маблағҳои Мақомоти иҷроияи маҳаллии ҳокимияти давлатӣ, соҳибкорон ва давлати Чин сохтмони муассисаҳои таълимӣ ва синфхонаҳои иловагӣ, аз ҷумла дар деҳаи Файзбахши деҳоти Сафобахш бинои нави МТМУ № 16, дар назди МТМУ № 74 - уми деҳоти Лолазор 5 синфхонаи иловагӣ, дар деҳаи Офтобрӯяи деҳоти Лолазор, деҳаи Навободи наву Зарнисори деҳоти Сангтӯда муассисаҳои таҳсилоти миёнаи умумии нав бомаром идома доранд.