Меҳмонон сараввал аз идораи рӯзнома дидан карданд. Ин ҷо бо заҳмати сармуҳаррири рӯзнома, номзади илмҳои филологӣ Носирҷон Маъмурзода ва ҳайати эҷодӣ осорхона ва китобхона таъсис дода шудааст. Дар осорхона дастгоҳҳои кории аввалини ин редаксия, амсоли дастгоҳҳои аксбардорӣ, мошинкаҳои чопкунанда ва дастхатҳои чеҳраҳои маъруфи ин боргоҳ нигоҳдорӣ мешаванд. Дар китобхона асосан асарҳои Президенти кишвар муҳтарам Эмомалӣ Раҳмон, рисолаҳои мансуб ба таърихи вилояти Хатлон ва ВАО-и маҳаллӣ, таълифоти дастпарварони ин мактаби рӯзноманигорӣ ҷой дода шудаанд. Ба замми ин, таърихи рӯзнома: лаҳзаҳои корӣ, аввалин сармуҳаррирон, кормандони собиқ, тими феълӣ дар суратҳои зиёд ба таври хеле муассир инъикос шудаанд.

Меҳмонон, алалхусус, раиси вилоят баъд аз тамошо ба меҳнати дастандаркорон баҳои баланд доданд. 

Иттилоъ дода шуд, ки солҳои охир дар партави ҳидоятҳои Сарвари давлат шароити корӣ дар ин идора бо дастгирии мақомоти иҷроияи ҳокимияти давлатии вилоят беҳтар шуда, шуруъ аз моҳи апрели соли 2021 рӯзнома дар як ҳафта ду маротиба бо теъдоди 10 ҳазор нусха нашр мешавад.

Дар идома дар маҷлисгоҳи мақомоти иҷроияи ҳокимияти давлатии вилоят таҳти унвони “Нақши рӯзномаи “Хатлон” дар татбиқи сиёсати давлатӣ дар соҳаи иттилоот” конфронси илмӣ-амалӣ баргузор шуд. 

“Ин нашрия, – зикр кард Қурбон Ҳакимзода дар рафти суханронии худ, – дар зарфи 90 соли мавҷудият дар саҳифаҳои худ таърихи рангини Хатлонзамин, меҳнати шоистаи онро бозтоб кардааст. Бо талаботи давру замон бо номҳои “Сохтмони зарбдори Вахш”, “Ҳақиқати Кӯлоб”, “Пахтакори сурх”, “Ҳақиқати Қӯрғонтеппа”, “Роҳи ленинӣ”, “Навиди Вахш” ва “Ҳақиқати Хатлон” ба дасти муштоқони худ расидааст. Чеҳраҳои шинохтаи миллат Аскаралӣ Набиев, Тӯра Қобилов, Шарифамоҳи Кишвардухт, Файзалӣ Чориев, Пиримқул Сатторӣ, Ҳусейн Маликов, Тоҳир Асомуддинов, Ҳасани Муродиён, Мурод Сотиев, Сайдалӣ Бобохонов, Ҳақназар Ғоиб, Бахтиёр Муртазоев, Саломиддин Мирзораҳматов, Аъзам Мӯсоев, Муҳаббат Мирзораҳимова, Ҳуриннисо Ализода, Давлат Султонов, Карим Давлат ва даҳҳо шахсиятҳои номдор дар ин боргоҳи ҳақиқатнигорӣ қаламфарсоӣ карда, шогирдони зиёдро ба камол расондаанд”.

Яке аз собиқ сармуҳаррирони соҳибноми “Хатлон” Шералӣ Яҳёев доир ба фаъолияти хеш, ки ба давраи ҷанги шаҳрвандии Тоҷикистон рост омадааст, ба ҷавонон қисса кард.

“Он солҳо кори журналистӣ ниҳоят хавфнок буд, – гуфт ӯ. – Мо корро баъд аз соатҳои 1-2-и шаб, яъне баъд аз холӣ шудани кӯчаҳо аз яроқбадастон оғоз мекардем. Бо вуҷуди ҳамаи ин заҳматҳо, ба фарзи мисол, маоши ман – сармуҳаррир ҳамагӣ 2 сомонӣ буд, ки то соли 2004 ба 17 сомонӣ расид. Азбаски бисёре аз роҳбарони вақт чӣ будани матбуотро дуруст сарфаҳм намерафтанд, боре аз як нафар чунин супориш гирифтем: “Мақолаи маро ҷой карда, газетро даҳ дақиқа пас дар рӯйи мизам мегузорӣ!”. Дигареаш пурсида буд: “Чӣ мушкил доред?”. Гуфтем: “Ҳуруфчин намерасад”. Гуфт: “Ҳамин ҳам гап шуд?! Дар кадом вазорат мефурӯшанд, ки ман харида орам?”. Фаҳмондем, ки ҳуруфчин номи техникаи корӣ не, балки унвони мутахассис аст. Он замон ҳама яроқ доштанд. Дар даромадгоҳи биное гуфтанд, ки “Яроқҳоро супурда, баъд дохил шавед!”. Ман ручкаамро болои миз гузоштам. Аз ин ҳазли ман посбони бино ба шӯр омад. Фаҳмондам, ки ин яроқи тавонои Ҳукумат буд ва хоҳад монд. Матбуот як мактабест, ки аз дигар навъи воситаҳои ахбори омма ба куллӣ фарқ мекунад”.

Сармуҳаррири имрӯзаи рӯзнома Носирҷон Маъмурзода шумораи идонаи 90-саҳифагии рӯзномаро, ки фарогири ҳаёти эҷодии гузашта ва имрӯзаи аҳли қалам аст ва китобҳои тозанашри “Эъҷози Истиқлол”, “Боргоҳи маънӣ” ва “Кишвардухт”-ро муаррифӣ кард. 

Дар охир ба фаъолони нашрия мукофоту ифтихорномаҳои соҳавию вилоятӣ тақдим шуд.