Зимни баррасии лоиҳа Абдуҷаббор Умарзода, вакили парлумон, гуфт, ки санади мазкур дар таҳрири нав бо тартиби ҳуқуқи ташаббуси қонунгузорӣ аз тарафи узви Маҷлиси миллии Маҷлиси Олии Ҷумҳурии Тоҷикистон Қурбон Ҳакимзода таҳия гардидааст. 

Сулаймон Зиёзода, вазири кишоварзӣ, иброз дошт, ки лоиҳаи Қонуни Ҷумҳурии Тоҷикистон «Дар бораи дастгирии давлатии соҳаҳои комплекси агросаноатии Ҷумҳурии Тоҷикистон» бо мақсади таҳкими соҳаҳои комплекси агросаноатӣ, рушди соҳаҳои ба ҳам алоқаманди иқтисодиёт, кишоварзӣ, саноат ва бехатарии озуқаворӣ таҳия шудааст. 

- Таҳлилҳо нишон медиҳанд, ки қонуни амалкунанда ба такмил ниёз дошта, дар таҳрири нав қабул кардани он иқдоми саривақтӣ буда, ба танзими муносибатҳо дар ин самт имконият медиҳад. Чунончи, мутобиқи моддаи 7 лоиҳаи қонун соҳаҳои комплекси агросаноатӣ мавриди танзими давлатӣ қарор гирифта, аз ҷумла тавассути андешидани чораҳои рушди қарздиҳии соҳаҳои афзал, ҷудо намудани кумаки молиявӣ, хариди маҳсулоти кишоварзӣ бо нархҳои кафолатӣ, танзими содироту воридоти маҳсулот, таҷҳизондан бо техникаю технологияи замонавӣ, татбиқи чораҳои танзими буҷетӣ, андозбандӣ ва гумрукӣ, мутобиқи қонунгузории Ҷумҳурии  Тоҷикистон амалӣ карда мешавад, - гуфт вазири кишоварзӣ.           

Дар ҳамин ҳол, Умед Солеҳзода, муовини вазири саноат ва технологияҳои нави  Ҷумҳурии Тоҷикистон, зикр кард, ки лоиҳаи қонуни мазкур ба танзим даровардани идоракунии устувори соҳаҳои комплекси агросаноатиро ҳангоми дастгирии давлатӣ муайян намуда, ба афзоиши истеҳсоли маҳсулоти кишоварзӣ ва коркарди саноатии он мусоидат менамояд. Инчунин, принсипҳои соҳаҳои комплекси агросаноатии кишварро дар самти таъмини амнияти озуқаворӣ, рушди соҳа, шаффофият ва рақобати солимро дар бозори дохилӣ таъмин карда, барои рушди соҳаҳои саноат бо мақсади афзунгардонӣ, таъмини рақобатпазирии иқтисоди миллӣ, таъсиси ҷойҳои кории нав, амалисозии лоиҳаи сармоягузорӣ ва рушди ислоҳоти саноатӣ такони ҷиддӣ мебахшад. 

Қабули лоиҳаи Қонуни Ҷумҳурии Тоҷикистон «Дар бораи дастгирии давлатии соҳаҳои комплекси агросаноатии Ҷумҳурии Тоҷикистон» муносибатҳои байни соҳавӣ ва ташкилоту корхонаҳои саноати хӯроквориро новобаста аз шакли моликият ба танзим дароварда, барои субъектҳои хоҷагидори комплекси агросаноатӣ ҷиҳати ҷорӣ намудани технологияи нав шароити мусоид фароҳам меорад. 

 

Маҳмуд МИРЗОЁН, 

«Ҷумҳурият»