маориф
ДДСТ: таваҷҷӯҳ ба соҳаи китобдорӣ афзудааст
- Дар арафаи Наврӯз боз 9 синфхонаи бузург, 2 студия барои донишҷӯёни факултаи театрӣ-бадеӣ, 2 студия барои муҳассилини шӯъбаи хореография ва толори консертӣ мавриди истифодабарӣ қарор гирифт, -гуфт зимни нишасти матбуотӣ Аслиддин Низомӣ, ректори Донишкадаи давлатии санъати Тоҷикистон ба номи Мирзо Турсунзода. Ҳамчунин афзуд, ки чанд соли охир маблағгузорӣ ба ин муассиса афзуд, бо таҷҳизоти зарурии замонавӣ таъмин гардид. Хобгоҳ аз таъмир баромад ва ба истифода дода шуд. Ҳамаи ин имкон фароҳам овард, ки таваҷҷӯҳи довталабон афзояду сатҳи сифати таълим боло равад. Бо дарназардошти дастовардҳои чашмрас донишкада дар шумори 5 муассисаи беҳтарини кишвар маҳсуб меёбад.
Дар посух ба пурсиши хабарнигорон ректор изҳор дошт, ки соли хониши гузашта 89 нафар донишкадаро хатм намуд ва ҳама бо ҷойи кор таъмин гардид. Имсол бошад, муассисаро беш аз 200 нафар донишҷӯ хатм мекунад ва аллакай харидор доранд. Албатта, ин шумор ҳанӯз ҷавобгӯи талабот нест, чун соҳаи фарҳанги кишвар ба 6 ҳазор мутахассис ниёз дорад.
Аслиддин Низомӣ ёдовар шуд, ки ҳамасола гурӯҳи устодон дар моҳи май ба шаҳру ноҳияҳои кишвар барои ҷалби соҳибистеъдодон сафари хидматӣ анҷом медиҳанд. Имсол низ ба ин маъракаи муҳим омодагии ҷиддӣ гирифтаанд.
Дар мавриди ҷалби довталабон ба факултаи китобдорӣ ва иттилоотшиносӣ изҳор шуд, ки нисбати солҳои гузашта таваҷҷӯҳ ба ин соҳа дар кишвар 2-3 маротиба афзудааст. Донишкада ба раёсату шӯъбаҳои фарҳанги шаҳру ноҳияҳо дар бораи ҷалбу пешниҳоди китобдорони оянда нома ирсол менамояд.
Абдулқодири РАҲИМ
Баёни ақида (0) Санаи нашр: №: Мутолиа карданд: 5369
