мулоқотҳо
МУЛОҚОТИ ЭМОМАЛӢ РАҲМОН БО ВЛАДИМИР ПУТИН
27 декабр дар шаҳри Санкт-Петербург Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ҳошияи вохӯрии ғайрирасмии сарварони кишварҳои узви Иттиҳоди Давлатҳои Мустақил бо Президенти Федератсияи Россия муҳтарам Владимир Путин мулоқот намуданд.
Зимни вохӯрӣ масоили ҳамкориҳои Тоҷикистону Россия дар сатҳи шарикии стратегӣ ва дар чаҳорчӯби Иттиҳоди Давлатҳои Мустақил баррасӣ гардиданд.
Президенти мамлакат муҳтарам Эмомалӣ Раҳмон мулоқотро имкони хуби баррасии дурнамои муносибатҳои ду кишвар маънидод карданд.
Аз вазъи феълии робитаҳои дуҷониба, рушди бемайлони онҳо, сатҳи ҳамкориҳои фарҳангию гуманитарӣ ва ҳаҷми гардиши мол байни ду давлат, ки дар соли 2021 беш аз 1 миллиард доллари ИМА-ро ташкил медиҳад, изҳори қаноатмандӣ шуд.
Ҷонибҳо барои баҳрабардорӣ аз имкониятҳои фарох дар соҳаҳои металлургия, истихроҷи маъданҳои кӯҳӣ, сохтмон, тандурустӣ, фарматсевтӣ ва дигар самтҳои бахши иқтисодӣ табодули андеша намуданд.
Дар мулоқот ба масъалаи таъсиси Шуро оид ба ҷалби сармояи мустақими Россия ба иқтисодиёти Тоҷикистон ҷиҳати фаъолгардонии ҳамкории сармоягузорӣ ва тақвияти кори Комиссияи байниҳукуматӣ оид ба ҳамкории тиҷоратию иқтисодӣ баҳри мусоидат ба ин раванд таваҷҷуҳ зоҳир гардид.
Масъалаҳои рушду таҳкими ҳамкориҳо дар соҳаҳои энергетика, гуманитарӣ, муҳоҷирати меҳнатӣ, илму маориф, фарҳанг ва тандурустӣ аз мавзуъҳои дигари мулоқот буданд.
Сарварони давлатҳо, ҳамчунин, авзои сиёсии ҷомеаи ҷаҳонӣ ва минтақа, ҳолати мураккаби гуманитарии Афғонистон, ҳамкорӣ дар соҳаи амният ва дигар масъалаҳои мавриди таваҷҷуҳро баррасӣ намуданд.
Дар охир Президенти мамлакат муҳтарам Эмомалӣ Раҳмон аз Президенти Федератсияи Россия муҳтарам Владимир Путин даъват ба амал оварданд, ки дар вақти барояшон муносиб бо сафари расмӣ ба Тоҷикистон ташриф оранд.
Баёни ақида (0) Санаи нашр: 29.12.2021 №: 251 Мутолиа карданд: 4315