туризм
103 шикоят оид ба гумшавии бағоҷи мусофирон
- КВД «Фурудгоҳи байналмилалии Душанбе» дар семоҳаи аввали соли 2010 бо нишондиҳандаҳои назаррас ноил гашта, парвозҳо дар фурудгоҳ аз ҷониби 19 ширкати ҳавопаймоӣ, аз ҷумла 6 ширкати ҳавопаймоии хориҷӣ, 10 ширкати ҳавопаймоии мамлакатҳои ИДМ ва 3 ширкати ҳавопаймоии Тоҷикистон – КВДҲ «Тоҷик Эйр», «Сомон Эйр» ва «Ист Эйр» сурат гирифт. Фурудгоҳ дар ин муддат ба 129 ҳазору 367 нафар мусофири ҷумҳурӣ ва ба 87 ҳазору 356 нафар мусофирони омада хизмат расонид. Миқдори умумии бор ва почтаи қабулгардида ва интиқолёфта аз ҷониби анбори тиҷоратии фурудгоҳ 563 тоннаю 340 килограммро ташкил дода, ба 1710 рейсҳои доимию чартерӣ (фармоишӣ) ва боркашонӣ хизмат расонида шудааст.
Яке аз масъалаҳои муҳиме, ки имрӯз дар пеш дорем, гум шудани бағоҷҳои мусофирон мебошад. Оид ба ин масъала 103 аризаи шикоятӣ ворид шуд, ки аз онҳо 76-тояш қонеъ гашт, 27-тояш дар марҳалаи баррасӣ қарор дорад.
Барои азнавсозии сохтмони терминали нави байналмилалии фурудгоҳ байни Ҳукумати Франсия ва Ҳукумати Тоҷикистон шартнома ба имзо расид. Арзиши умумии сохтмон 27 миллион евроро ташкил дода, аз ин 20 миллион евро саҳми ҷониби Франсия, 7 миллион евро саҳми ҷониби Тоҷикистон мебошад.
Аз рӯи нақшаи пешбинишуда сохтмони терминали нави байналмилалӣ бояд дар рӯзи ҷашни 20-солагии Истиқлолияти Ҷумҳурии Тоҷикистон анҷом ёбад, -гуфт зимни нишасти матбуотӣ Азиз Иброҳимов, муовини директори генералии КВД «Фурудгоҳи байналмилалии Душанбе».
Муҳаммадзоиршо ШАРИФЗОДА
Баёни ақида (0) Санаи нашр: №: Мутолиа карданд: 6955
