Ҷиҳати пурра ва дар дохили кишвар ба роҳ мондани коркарди ниҳоии хокаи маъдани тилло ва мис 29 декабри соли 2021 вакилони парлумон Созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди Корхонаи муштараки «Зарафшон» оид ба коркарди маҷмуии конҳо «Тарор», «Ҷилва» ва бунёди корхонаи металлургӣ барои барориши маҷмуии тилло ва мис тавассути оксидкунии фишурда аз хокаҳои бойгардондашудаи тилло ва мис дар шаҳри Панҷакенти вилояти Суғдро, ки 12 ноябри соли 2021 ба имзо расида буд, ҷонибдорӣ карданд. 

Саъдӣ Қодирзода, раиси Кумитаи давлатии сармоягузорӣ ва идораи амволи давлатӣ, ҳангоми баррасии созишнома гуфт, ки зимни татбиқи лоиҳа ҳаҷми умумии сармоягузории мустақими хориҷии ба иқтисодиёти кишвар ҷалбшаванда беш аз 1,3 миллиард сомониро (117 миллион доллари ИМА) ташкил намуда, барои сокинони маҳаллӣ беш аз сад ҷойи нави корӣ муҳайё мешавад. 

Тибқи созишнома, дар корхонаи бунёдшаванда се соли аввали татбиқ, ки марҳилаи сохтмонро дар бар мегирад, таносуби кормандон 80 дарсад маҳаллӣ ва боқӣ хориҷиро ташкил дода, пас аз мавриди баҳрабардорӣ қарор гирифтани он шумораи кормандони маҳаллӣ боз 10 дарсади дигар зиёд мегардад. 

- Иқтидори корхонаи бунёдшаванда коркарди 165 ҳазор тонна хокаи маъдан дар як сол буда, барои дар оянда коркард намудани хокаи маъдани дигар корхонаҳои ҷумҳурӣ шароит фароҳам меорад. Дар ҳолати татбиқи муваффақонаи лоиҳа ҳаҷми андозҳои пардохтшаванда аз ҷониби ширкат тибқи ҳисобҳои пешакӣ солона беш аз 40 миллион долларро ташкил медиҳад. Муҳлати созишнома аз санаи эътибор пайдо кардан 10 солро дар бар мегирад, - зикр кард Саъдӣ Қодирзода.    

Парвиз Шодизода, вакили маҷлиси намояндагон, созишномаи мазкурро қадами навбатӣ барои расидан ба ҳадафи чоруми миллии стратегӣ – саноатикунонии босуръати кишвар унвон кард. Ӯ гуфт, ки аз ҷониби Президенти кишвар эълон гардидани солҳои 2022 – 2026 ҳамчун Солҳои рушди саноат маҳз ба хотири бунёди бештари корхонаҳои саноатӣ, ба кор андохтани иқтидорҳои саноатии мавҷуда ва ба ин васила ҳарчи бештар таъсис додани ҷойҳои нави корӣ бо музди меҳнати арзанда, аз кишвари аграрӣ - саноатӣ ба кишвари саноатӣ - аграрӣ табдил додани Тоҷикистон мебошад. 

- Ҳақиқати бебаҳс аст, ки пешрафти соҳаи саноат дар таъмини рушди устувори иқтисодии ҳар кишвар ҷойгоҳи арзанда дорад. Аз ин мавқеъ, Созишномаи сармоягузорӣ байни Ҳукумати Ҷумҳурии Тоҷикистон ва Ҷамъияти дорои масъулияти маҳдуди Корхонаи муштараки «Зарафшон» оид ба коркарди маҷмуии конҳои «Тарор», «Ҷилва» ва бунёди корхонаи металлургӣ барои барориши маҷмуии тилло ва мис иқдоми фараҳбахш буда, аз чанд ҷиҳат муҳим мебошад. Аз ҷумла, бунёди корхонаи металлургӣ барои барориши маҷмуии тилло ва мис ҳамчун воҳиди сохтории саноатӣ, метавонад ҷиҳати татбиқи дастуру супоришҳои Паёми навбатии Пешвои миллат мусоидат намояд. Ҳамчунин, ин тарҳ барои расидан ба ҳадафи чоруми миллӣ – саноатикунонии босуръати кишвар, истеҳсоли маҳсулоти воридотивазкунанда, таъсиси ҷойҳои кории дорои тахассуси баланд ва муҳимтар аз ҳама, эътирофи Ҷумҳурии Тоҷикистон ҳамчун давлати истеҳсолкунандаи маъданҳои хусусияти стратегидошта такон мебахшад. Аз нигоҳи сиёсати сармоягузорӣ низ созишнома бахши ояндадор будани соҳаи иктишоф, коркард ва истеҳсоли саноати маъданҳои кӯҳиро тақвият мебахшад ва ҳамчун неруи нарми истеҳсолӣ, ҷалби таваҷҷуҳи сармояи мустақими хориҷиро осонтар мегардонад, - гуфт Файзулло Баротзода, вакили парлумон.

Саъдӣ Қодирзода дар суҳбат бо мо гуфт, ки аз ҷониби сармоягузор пурра риоя гардидани қонунгузории Ҷумҳурии Тоҷикистон, аз ҷумла ҳифзи муҳити зист, танзими ҳуқуқии худро ёфтааст. Моддаи 12 созишнома ба амнияти экологӣ бахшида шуда, тибқи он, корхона муваззаф шудааст, ки ҳифзи муҳити зистро ҷиддӣ риоя намояд. 

 

Маҳмуд МИРЗОЁН,  «Ҷумҳурият»